ភ្នំពេញៈ លោក កៅ សារ៉ាវុធ អភិបាលរងខណ្ឌជ្រោយចង្វារ នៅថ្ងៃទី១០ ខែសីហា ឆ្នាំ២០១៨នេះ បានដឹកនាំកម្លាំងចម្រុះ ចុះបង្ក្រាបសង្វៀនជល់មាន់មួយកន្លែង ក្នុងភូមិគៀនឃ្លាំង សង្កាត់ជ្រោយចង្វារ រាជធានីភ្នំពេញ ដោយបានឃាត់ខ្លួនមនុស្សចំនួន១២នាក់ ម៉ូតូចំនួន៣៧គ្រឿង រថយន្តមួយគ្រឿង និងមាន់ជល់ចំនួន៧ក្បាល។
លោក កៅ សារ៉ាវុធ បានប្រាប់ឲ្យដឹងថា ប្រតិបត្តិការខាងលើនេះ បន្ទាប់ពីទទួលបានសេចក្តីរាយការណ៍ពីប្រជាពលរដ្ឋនៅជិតនោះ ក្រោយមកលោក ឃ្លាំង ហួត អភិបាលខណ្ឌជ្រោយចង្វារ បានបញ្ជាឲ្យលោកដឹកនាំកម្លាំងចម្រុះចុះបង្ក្រាបទីតាំងជល់មាន់ខាងលើនេះភ្លាម។
ក្នុងប្រតិបត្តិការខាងលើនេះ កម្លាំងចម្រុះបានធ្វើការឃាត់ខ្លួនមនុស្សចំនួន ១២នាក់, ម៉ូតូ ៣៧គ្រឿង, រថយន្ត Tundra មួយគ្រឿង, និងមាន់ជល់ចំនួន ៧ក្បាល រួមនឹងសម្ភារមួយចំនួនដែលបម្រើឲ្យសង្វៀនជល់មាន់។ កម្លាំងជំនាញបាននាំខ្លួនមនុស្សទាំងអស់នោះទៅកាន់អធិការដ្ឋាននគរបាលខណ្ឌជ្រោយចង្វារ ដើម្បីកសាងសំណុំរឿង ចាត់ការបន្តតាមនីតីវិធី៕
