Friday, August 24, 2018

ផ្ដន្ទាទោសអ្នកស្រី ទេព វន្នី និងសកម្មជនបឹងកក់៥រូបទៀត ដាក់​ពន្ធនាគារម្នាក់៦ខែ ក្នុងសំណុំរឿងថ្មី តែទោសត្រូវព្យួរ

អាម៉ាប៉ាប៉ាញ៉ូស

ភ្នំពេញៈ លោក ប៊ុន ធី ចៅក្រមជំនុំជម្រះសាលាដំបូងរាជធានីភ្នំពេញ នៅ​ថ្ងៃទី២៤ ខែសីហា  នេះ បានបើកសវនាការជំនុំជម្រះ និងប្រកាសសាលក្រមផ្តន្ទាទោស អ្នកស្រីទេព វន្នី និងសកម្មជនបឹងកក់ ៥រូបទៀត ពាក់ព័ន្ធការគំរាមថា នឹងសម្លាប់អតីតស្ត្រីបឹងកក់ឈ្មោះ លី មុំ កាលពីឆ្នាំ២០១២។

សាលក្រមនោះ បានផ្តន្ទាទោសឈ្មោះ ទេព វន្នី, ឈ្មោះ ហេង មុំ , ឈ្មោះង៉ែត ឃុន, ឈ្មោះ ឆេង លាភ, ឈ្មោះគង់ ចាន់ថា និងឈ្មោះ តុល ស្រី ដាក់ពន្ធនាគារក្នុងម្នាក់ៗ៦ខែ ពីបទគំរាមថានឹងសម្លាប់ ប៉ុន្តែទោសត្រូវព្យួរទាំងអស់។

ក្រោយការប្រកាសសាលក្រម លោកស្រី ទេព វន្នី បានថ្លែងប្រាប់អ្នកសារព័ត៌មាននៅមុខតុលាការថា អ្នកស្រីមិនសុខចិត្តទៅនឹងសេចក្តីសម្រេចរបស់តុលាការក្រុងភ្នំពេញនោះទេ ហើយអ្នកស្រីនឹងប្តឹងជំទាស់ទៅកាន់សាលាឧទ្ធរណ៍នៅពេលខាងមុខ។

សូមបញ្ជាក់ថា កាលពីថ្ងៃទី២០ ខែសីហា​ ឆ្នាំ២០១៨ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រកម្ពុជា តាមសំណើរបស់សម្តេចតេជោ ហ៊ុន សែន នាយករដ្ឋមន្រ្តី​កម្ពុជា បានចេញព្រះរាជក្រឹត្យលើកលែងទោសដល់សកម្ម ជនដីធ្លីចំនួន ៣នាក់ រួមមាន ៖ អ្នកស្រី ហេង មុំ, អ្នកស្រី បូ ឆវី និងអ្នកស្រី គង់ ចន្ថា ដែលត្រូវបានផ្ដន្ទាទោស​ដាក់​ពន្ធនាគារ​រយៈពេល៦​ខែ កាល​ពី​ថ្ងៃ​ទី​១៩ ខែ​កញ្ញា ឆ្នាំ​២០១៦ ពី​បទ​ប្រមាថ និង​ប្រឆាំង​អ្នក​រាជការ​សាធារណៈ និងលើកលែងទោសដល់អ្នកស្រី​ ទេព  វ​ន្នី ដែលត្រូវបានតុលាការ ផ្តន្ទាទោសដាក់ពន្ធនាគារ២​ឆ្នាំ ៦​ខែ ពីបទ​ហិង្សាដោយ​ចេតនា​មាន​ស្ថាន​ទម្ងន់​ទោស តាម​អំណាច​សាលដីកា​លេខ​៥១ ចុះ​ថ្ងៃទី​០៧ ខែកុម្ភៈ ឆ្នាំ​២០១៨ របស់​តុលាការ​កំពូល​ផងដែរ។

ក្រោយមានព្រះរាជក្រឹត្យ និងដីកាដោះលែងនេះ សកម្មជនដីធ្លី សហគមន៍បឹងកក់ អ្នកស្រី ទេព វន្នី ត្រូវបានដោះលែងចេញពីពន្ធនាគារ ម២ នៅវេលាម៉ោងប្រមាណ៩យប់ថ្ងៃទី២០ ខែសីហា ឆ្នាំ២០១៨ តែម្តង៕

@Amapapa.News

Feature Ads