ពោធិ៍សាត់ៈ សាកសពបុរសចំណាស់ម្នាក់ ត្រូវបានឃាតកមិនស្គាល់មុខសម្លាប់ ហើយកាត់ក្បាល រួចយកសាកសពបោះបណ្ដែតទឹកស្ទឹង។
ឃាតកម្មដ៏សាហាវព្រៃផ្សៃខាងលើនេះ បង្កការភ្ញាក់ផ្អើលកាលពីវេលាម៉ោង៩និង៣០នាទីថ្ងៃសុក្រ ១៣កើត ខែស្រាពណ៍ ឆ្នាំចសំរឹទ្ធិស័កព.ស២៥៦២ ត្រូវនឹងថ្ងៃទី២៤ ខែសីហា ឆ្នាំ២០១៨ នៅចំណុចស្ទឹងរលាប ព្រក ស្ថិតនៅភូមិក្សេត្របូរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។
សមត្ថកិច្ច បានឲ្យដឹងថា សាកសពឈ្មោះ ម៉ែន ថា ភេទប្រុស អាយុ៥៧ឆ្នាំ រស់នៅភូមិត្រាំងសេះ ឃុំបឹងបត់កណ្ដាល ស្រុកបាកាន ខេត្តពោធិ៍សាត់។
ក្រោយកើតហេតុសមត្ថកិច្ចជំនាញស្រុក ដឹកនាំដោយលោកអធិការ សហការជាមួយកម្លាំងជំនាញនគរបាលខេត្ត ចុះទៅធ្វើការពិនិត្យលើសាកសពឃើញថា សពជនរងគ្រោះ ត្រូវឃាតកកាត់ក្បាលបាត់ចេញពីដងខ្លួន។
បើតាមបំភ្លឺពីប្រពន្ធជនរងគ្រោះឈ្មោះ យ៉ម ហុន និងប្រជាពលរដ្ឋឈ្មោះ អឹម សុខា ជន ប្រាប់សមត្ថកិច្ចថា ពាក់ព័ន្ធករណីឃាតកម្មនេះ បណ្ដាលមកពីទំនាស់ពាក្យសម្ដី ហើយសង្ស័យអាចមានគ្នា៣នាក់។
ក្រោយពិនិតចប់សព្វគ្រប់សមត្ថកិច្ច បានប្រគល់សាកសពជូនក្រុមគ្រួសារយកទៅធ្វើបុណ្យប្រពៃណី។ បច្ចុប្បន្ន សមត្ថកិច្ចកំពុងចុះស្រាវជ្រាវ ដើម្បីស្វែងរកឃាតកយកមកផ្ដន្ទាទោសតាមផ្លូវច្បាប់៕
