Sunday, August 19, 2018

ពលរដ្ឋកំពុងព្រួយបារម្ភ បញ្ហាអសន្តិសុខ ជុំវិញទីតាំងបើក Internet ២៤ម៉ោង បង្កប់ល្បែងស៊ីសង

អាម៉ាប៉ាប៉ាញ៉ូស

ភ្នំពេញៈ ក្រោយបោះឆ្នោត អាណត្តិទី៦រួចថ្មីៗនេះ ពលរដ្ននៅតាមមូលដ្ឋានសង្កាត់នានា បានទទូចស្នើសុំឲ្យ​អភិបាលរាជធានីភ្នំពេញ មេត្តាដាក់ចេញនូវផែនការ ឬបទញ្ជា ដែលធ្លាប់មានប្រសិទ្ធភាពជាថ្មី​ឡើងវិញផង ជូនអភិបាលខណ្ឌទាំង១២ ដើម្បីបន្តចាត់វិធានការចុះពិនិត្យទីតាំងបើក​ Internet ២៤ម៉ោង ក្រោយលួចបង្កប់ល្បែងស៊ីសងខុសច្បាប់ ដែលពួកគាត់​ កំពុងមាន​ការ​ព្រួយ​បារម្ភ​ ដោយសារអ្នកចាញ់ល្បែងអស់ទាំងនោះ នៅពពាក់​ព​ពួន​គ្នា​ និង​ពេល​ខ្លះ​អាច​បែកគំនិត​រហូត​ប្រព្រឹត្ត​បទល្មើស​លួច ឆក់ ប្លន់ និង​សកម្មភាព​អសន្តិសុខ​ផ្សេង​ៗ​ជាដើម ដើម្បី​យក​លុយ​មក​បំពេញ​ចំណង់ចិត្ត​ខ្លួន ​ក្នុង​ការ​លេង​ល្បែងស៊ីសង​អនឡាញគ្រប់ប្រភេទនេះ ដោយទីតាំង​ខ្លះ​ប្រមូលផ្តុំ​ទៅ​ដោយ​ក្រុម​ក្មេងស្ទាវ​ ប្រើប្រាស់​ថ្នាំ​ញៀន​ទៀតផងដែរ។

កន្លងមក​អភិបាលរាជធានីភ្នំពេញលោក ឃួង ស្រេង ធ្លាប់បានបើកកិច្ចប្រជុំមួយ ជាមួយមន្ដ្រីមកពីក្រសួងប្រៃយ៍សណី អភិបាលខណ្ឌទាំង១២ នគរបាល អាវុធហត្ថ និងមន្ដ្រីពាក់ព័ន្ធ ដាក់ផែនការចុះត្រួតពិនិត្យឡើងវិញ តាមទីតាំងបើកណេត ឬ Internet ២៤ម៉ោង ក្នុងមូលដ្ឋានរបស់ខ្លូន ចុះទៅពិនិត្យមើលទីតាំងទាំងនេះ មើលអាជ្ញាប័ណ្ណ ដែលចេញដោយមន្ទីរ ឬក្រសួងពាក់ព័ន្ធ ហើយបើគ្មានអាជ្ញាប័ណ្ណអនុញ្ញាតទេ ត្រូវបិទតែម្ដង។ ទោះបីជាមានច្បាប់ មានអាជ្ញាប័ណ្ណត្រឹមត្រូវ គឺត្រូវរកឲ្យឃើញបទល្មើស ដោយមានភ័ស្ដុតាងច្បាស់លាស់ ពីការលួចបើកល្បែងស៊ីសងខុសច្បាប់ ហើយសុំគោលការណ៍ពីព្រះរាជអាជ្ញា ដើម្បីចុះទៅបិទទីតាំងទាំងនោះ និងរាយការណ៍ទៅមន្ទីរ ឬក្រសួងដែលពាក់ព័ន្ធត្រូវលុបអាជ្ញាប័ណ្ណចេញតែម្ដង។

ជាក់ស្ដែងមកទល់និងបោះឆ្នោតរួចហើយនេះ សង្កេតឃើញ​ថា ​គ្រប់បណ្ដាហាងណេត និង Internet ២៤ម៉ោង ស្ទើរទាំងអស់ មិនសូវបានបម្រើដល់វិស័យទេសចរណ៍ទេ ក្នុង​សម័យតេជោសន្តិភាព ដែលជាសម័យជឿនលឿននេះ ព្រោះទេសចរបរទេសស្ទើរតែទាំងអស់ មានសុទ្ធតែ Smart Phone សម្ភារៈនិយមទំនើបៗ ដែលប្រើប្រព័ន្ធអ៊ីនធឺណេតនៅក្នុងដៃហើយ  ដើម្បីប្រើប្រាស់ ឬឆ្លើយឆ្លងទៅក្រុមគ្រួសារពួកគាត់ ហើយក្រុមនិស្សិតខ្លះក៏មិនយកទីតាំងនេះ ដើម្បីធ្វើការស្រាវជ្រាវ ឬសិក្សាបន្ថែមម៉ោងដូចសម័យមុនទៀតដែរ ព្រោះសម័យតេជោសម័យសន្តិភាពនេះ សិស្ស​ និស្សិត​ជាច្រើន សុទ្ធតែមាន Smart Phone ក្នុងដៃ និងខ្លះទៀតមាន​កុំព្យូទ័រ ​ឬ Laptop ភ្ជាប់ប្រព័ន្ធ​អ៊ិនធឺណិត​ យកតាមខ្លួន​ និងទុកប្រើប្រាស់នៅផ្ទះ​រៀងៗខ្លួន​ស្ទើតគ្រប់គ្នាហើយណាមួយទោះជាអ្នកអត់លទ្ធភាព ក៏គេមិនយកទីតាំងហាង​អ៊ីនធឺណិត​ទាំងនោះ ដើម្បីស្រាវជ្រាវ ឬសិក្សាបន្ថែមអីទៀតដែរ ព្រោះសុទ្ធតែមនុស្សដែលងប់ងល់នឹងល្បែង នៅចាក់បាល់​ លេងភ្នាល់តាមអនឡាញ​ ពពាក់ពពូនគ្នា​ពេញក្នុងណេត២៤ម៉ោងអស់ទាំងនោះ ដែលម្ចាស់ទីតាំងស្ទើរគ្រប់ទាំងអស់ បានយករូបភាពបើកហាង Internet ដែលអាងមានមានច្បាប់ និងអាជ្ញាប័ណ្ណ ពីក្រសួងប្រៃយ៍សណី ក្រសួងវប្បធម៌ និងក្រសួងព័ត៌មាន បែរជាលួចបង្កប់ល្បែងស៊ីសង តាមប្រព័ន្ធអនឡាញ ដែលពេលខ្លះបែរជាពិបាកនឹងចាត់វិធានការជាមួយ​ពួកគាត់ទៅវិញ។

តាមព័ត៌មានពីមូលដ្ឋានរបស់ប្រជាពលរដ្ឋ ដែលប្រឈមបានឲ្យដឹងថា បើយើងគ្រាន់តែមើលពីខាងក្រៅ គឺគ្រប់ទីតាំងហាង Internet ដែលលើកស្លាក និងជ្រកក្រោមស្លាក ណេត ២៤ម៉ោង ឬ Internet ២៤ម៉ោង ជាលក្ខណៈ​ធម្មតា​ ដោយបិទទ្វារជិតឈឹង​ តែគឺសុទ្ធតែបានលួចបើកល្បែងភ្នាល់ស៊ីសងខុសច្បាប់ ជាច្រើនប្រភេទ តាមអនឡាញ ដូច្នេះពួកគាត់សង្ឃឹមថា លោក​អភិបាលរាជធានីភ្នំពេញ នឹងដាក់ចេញចំណាត់ការនោះជាថ្មីម្ដងទៀតផង ដើម្បីធ្វើអនុវត្តឲ្យមានប្រសិទ្ធិភាពឡើងវិញ​ ដោយក្ដីគោរព​ ព្រោះចំណាត់ការចាស់​ បានសាបជិតអស់ទៅហើយ រហូតដល់ថ្នាក់ផ្គើន និងបញ្ជា អភិបាលរាជធានីភ្នំពេញ លួចបើកដូចផ្សិតរាប់សិបកន្លែងក្នុងរាជធានីទៀតផង៕

@Amapapa.News

Feature Ads