ភ្នំពេញៈ ស្រ្តីម្នាក់ បានទ្រហោយំឱបសពប្តី ក្រោយពីយកគ្នាជាប្តីប្រពន្ធ ទើបបាន៦ខែ ស្រាប់តែចោរចាក់សម្លាប់ បោះចោលសពក្នុងវាលស្រែ ហើយប្លន់យកម៉ូតូទៅបាត់។
សព ត្រូវបានគេប្រទះឃើញ បង្កឲ្យមានការភ្ញាក់ផ្អើល កាលពីម៉ោង៦ព្រឹក ថ្ងៃទី១៤ ខែកញ្ញា ឆ្នាំ២០១៨ ស្ថិតនៅដីវាល ក្នុងបរិវេណខាងមុខរោងចក្រ ហូបវែល ភូមិកប់កង សង្កាត់ចោមចៅ២ ខណ្ឌពោធិ៍សែនជ័យ។
លុះដល់វេលាម៉ោង៩និង១០នាទីព្រឹកថ្ងៃដដែល មានស្រ្តីម្នាក់ឈ្មោះ ប៉ុល រិន អាយុ២៦ឆ្នាំ មុខរបរ កម្មកររោងចក្រ ដែលអះអាងថាជាប្រពន្ធជនរងគ្រោះ បានរៀបរាប់ប្រាប់សមត្ថកិច្ចឲ្យដឹងថា ប្តីគាត់ (សព) ឈ្មោះ ឡាញ់ វ៉ន អាយុ២៥ឆ្នាំ មុខរបរ រត់ម៉ូតូឌុប មានស្រុកកំណើត ស្រុកឡែម ខេត្តបាត់ដំបង និងមានទីលំនៅ ភូមិតំណាក់ត្រយឹង ឃុំតាកែន ស្រុកឈូក ខេត្តកំពត តែមកស្នាក់នៅផ្ទះជួល ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ។
ប្រពន្ធជនរងគ្រោះ បន្តថា គាត់ទាំងពីរ ទើបតែរៀបការបាន៦ខែ ជារៀងរាល់ថ្ងៃ ប្តីគាត់ចេញរត់ឌុប ធម្មតាចូលផ្ទះនៅម៉ោង៩យប់ តែនៅយប់ថ្ងៃទី១៣ ម្សិលមិញ មិនបានឃើញប្តីចូលផ្ទះឡើយ បាត់រហូតព្រឹកថ្ងៃទី១៤ ខែកញ្ញា នេះ ទើបទទួលព័ត៌មានថា ប្តីត្រូវបានចោរចាក់សម្លាប់ ប្លន់យកម៉ូតូ សេ១២៥ សេរី២០១១ មួយគ្រឿងទៅបាត់។
តាមប្រជាពលរដ្ឋបានឲ្យដឹងថា ឃាតកម្មនេះ មិនដឹងកើតហេតុតាំងពីពេលណាមកនោះទេ បន្ទាប់ពីមានកម្មករ ធ្វើដំណើរចូលធ្វើការរោងចក្រ ឆ្លងកាត់តាមផ្លូវ ចូលរោងចក្រ ក៏ប្រទះឃើញសពដេកស្លាប់ក្នុងវាលស្រែ ក្បែរផ្លូវ ដោយមានធ្លាក់មួកសុវត្ថិភាពចំនួន២លើផ្លូវ និងមានដាមឈាម ហូរធ្លាក់តាមផ្លូវ ផងដែរ ទើបបង្កឲ្យភ្ញាក់ផ្អើល រាយការណ៍ប្រាប់សមត្ថកិច្ចមូលដ្ឋានចុះទៅពិនិត្យដល់កន្លែងកើតហេតុ ។
តាមការសន្និដ្ឋានជំហានដំបូង បានឲ្យដឹងដា ករណីនេះ ជាករណីចាក់ប្លន់យកម៉ូតូ ក្នុងរូបភាព ជនរងគ្រោះឌុប ជនសង្ស័យជាមនុស្សស្រី ដែលជាធ្នាក់ ចូលទៅចំណុចខាងលើ លុះឌុបចេញមកវិញ ត្រូវបក្ខពួកជនសង្ស័យស្ទាក់ចាប់ រួចអារកពីក្រោយ ហើយយកម៉ូតូទៅបាត់។ សព ឃើញនៅគម្លាតពីកន្លែងធ្លាក់មួក ស្បែកជើង ប្រមាណ៥០ម៉ែត្រពីគ្នា បើតាមសន្និដ្ឋាន ជនរងគ្រោះអាចរត់ដេញតាមម៉ូតូ អស់ខ្យល់ដួលចូលទឹកស្រែតែម្តង។
សមត្ថកិច្ច បញ្ជាក់ថា សាកសពមានស្នាមរបួសមុត សុះពីក្រោយស្មា ក។ ហើយបច្ចុប្បន្នសមត្ថកិច្ចជំនាញបានប្រមូលព័ត៌មាននៅជុំវិញកន្លែងកើតហេតុ ដើម្បីធ្វើការស្រាវជ្រាវរកឃាតកយកមកផ្ដន្ទាទោសតាមផ្លូវច្បាប់៕
