ភ្នំពេញៈ អ្នកនាំពាក្យគណបក្សប្រជាជនកម្ពុជា បានអះអាងថា លោក សម រង្ស៊ី អតីតមេបក្សប្រឆាំង បានទទួលស្គាល់អសមត្ថភាព និងការបរាជ័យរបស់ខ្លួនហើយ។
ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីឃើញលោក សម រង្ស៊ីបង្ហោះរូបថតជាមួយក្រុមហែហមខ្លួនបានឈរនៅក្បែរកន្លែងកិច្ចប្រជុំសភាអ៊ឺរ៉ុប កាលពីថ្ងៃទី១៣ កញ្ញា កន្លងមក។
លោក សុខ ឥសាន បានលើកឡើងថា ក្នុងការចូលមកធ្វើនយោបាយនៅកម្ពុជាជាង២៥ឆ្នាំ សម រង្ស៊ី រូបនេះ នៅសល់តែគូទខោ ហើយត្រូវនិរទេសខ្លួនកណ្តាលវាលវដ្តសង្សារ កណ្តោ ចកណ្តែងអត់កោះត្រើយ។
លោកបញ្ជាក់ថា «គណបក្ស និងចលនា ដែលបានបង្កើតឡើង ត្រូវរលំរលាយជាបន្តបន្ទាប់ទាំងនៅក្នុងប្រទេស ទាំងនៅក្រៅប្រទេស។ មនុស្សក្រោមបង្គាប់ បានព្រាត់ប្រាស់គ្មានសល់»។
ជាមួយគ្នានោះដែរ លោក សុខ ឥសាន ក៏បានលើកឡើងថា សព្វថ្ងៃទណ្ឌិត សម រង្ស៊ី មានភារកិច្ចដើរតែភូតភរកុហកបោកប្រាស់ បំភាន់សភាពការណ៍ បន្លំមតិសាធារណៈ ហើយដើរប្រមូលស្រោមសបុត្រពីអ្នកឆោតល្ងង់មួយចំនួន ដែលជឿស៊ប់គ្មានការពិចារណា។
លោកបានបញ្ជាក់ថា នៅថ្ងៃទី១៣ កញ្ញា ២០១៨ ទណ្ឌិតរូបនេះ បានទៅឈរក្បែរកន្លែងប្រជុំរបស់សភាអីយូ ហើយបានបង្ហោះសារភូតកុហកមួយបែបខែងរ៉ែងថា ខ្លួនមិនខ្ចីចរចាជាមួយគណបក្សប្រជាជនកម្ពុជា និងរាជរដ្ឋាភិបាលកម្ពុជាទេ ទុកឲ្យចរចាជាមួយអន្តរជាតិចុះ។ បានអីនឹងចរចា បើទណ្ឌិតរូបនេះ អត់មានអីត្រូវចរចាផងនោះ។ ដូច្នេះអត់មានអីត្រូវចរចាជាមួយក្រុមខ្មោចបីសាចក្រៅច្បាប់នេះឡើយ សូមបន្តរស់នៅពនេចរណ៍ ឯនាយសមុទ្រ តាមយថាកម្មទៅចុះ។
សូមជម្រាបថា ការលើកឡើងរបស់លោក សុខ ឥសាន នេះ បន្ទាប់ពីលោក សម រង្ស៊ី បានលើកឡើងបណ្តាញសង្គមថា លោកមិនចរចាជាមួយគណបក្សប្រជាជនកម្ពុជាទេ គឺទុកឲ្យរាជរដ្ឋាភិបាលចរចាជាមួយអន្តរជាតិ៕