ភ្នំពេញៈ ស្ត្រីជនជាតិចិនម្នាក់ តាំងខ្លួនជាព្រះ ដើរស្រែកឡូឡាតាមផ្លូវសាធារណៈ ត្រូវបាននគរបាលប៉ុស្តិ៍ចតុមុខ ខណ្ឌដូនពេញ ឃាត់ខ្លួន បញ្ជូលមកអគ្គនាយកអន្តោប្រវេសន៍ ដើម្បីធ្វើការសាកសួរ។
នគរបាលអន្តោប្រវេសន៍ បញ្ជាក់ថា នៅថ្ងៃទី១៣ ខែកញ្ញា ឆ្នាំ២០១៨ វេលាម៉ោង៩៖៣០នាទី ព្រឹក ការិយាល័យស៊ើបអង្កេត និងអនុវត្តនីតិវិធី បានទទួលជនបរទេសម្នាក់ ឈ្មោះ QIN ZI YUAN ភេទស្រី អាយុ២៩ឆ្នាំ ជនជាតិចិន ពីកម្លាំងនគរបាលប៉ុស្តិ៍ចតុមុខ ខណ្ឌដូនពេញ បន្ទាប់ពីស្ត្រីរូបនេះ បានកាន់ដំបងធំប្រវែងកន្លះម៉ែត្រ ស្រែកឡូឡានៅតាមទីសាធារណៈ រំខានដល់ប្រជាពលរដ្ឋ គ្មានលិខិតឆ្លងដែនជាប់នឹងខ្លួន។
នគរបាល បន្តថា បន្ទាប់មកកម្លាំងការិយល័យ បានធ្វើការសាកសួរ ឃើញថា ស្ត្រីចិនរូបនេះចូលមកប្រទេសកម្ពុជានៅថ្ងៃទី២៦ ខែសីហា ឆ្នាំ២០១៨ តាមច្រកអន្តរជាតិព្រលានយន្តហោះភ្នំពេញ។ រយៈកាលស្នាក់នៅប្រទេសកម្ពុជា គឺគ្មានការងារច្បាស់លាស់ គ្មានទីកន្លែងស្នាក់នៅពិតប្រាកដ និងមានសតិមិនប្រក្រតី ដោយនិយាយតាំងខ្លួនឯងថា ជាព្រះ។
បច្ចុប្បន្ននគរបាលអន្តោប្រវេសន៍ កំពុងបន្តនីតិវិធីលើស្ត្រីជនជាតិចិនរូបនេះ៕