រាជធានីភ្នំពេញ ៖ កាលពីម៉ោង០១ និង៣០នាទីរសៀល ថ្ងៃទី១៣ ខែកញ្ញា ឆ្នាំ២០១៨ នេះនៅចំណុចផ្សារព្រៃទា ស្ថិតក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ មានការភ្ញាក់ផ្អើលមួយ ដោយមានករណីចោរកម្មកើតឡើង ដែលបង្កដោយជនសង្ស័យជានារីវ័យក្មេងមួយរូប ដោយសង្ស័យថា នាងជាចោរលួច ក្រោយពីនារីរូបនោះដើរចូលទៅក្នុងផ្ទះមួយកន្លែង ខាងលើនេះ ។
អ្វីដែលភ្ញាក់ផ្អើលទៀតនោះ គឺមានប្រជាពលរដ្ឋម្នាក់បានចាប់នារីវ័យក្មេងខាងលើនេះ ម្នាក់វាយដំ និងកោរសក់ក្បាល បង្ហោះហ្វេសប៊ុកថែមទៀតផង បើទោះបីជានាងមានការលើកដៃសំពះអង្វរយ៉ាងណាក៍ដោយ។
បើតាមប្រភពបានឲ្យដឹងថា នៅមុនពេលកើតហេតុ នារីសង្ស័យខាងលើនេះ បានដើរចូលទៅក្នុងផ្ទះលក់ដូរមួយកន្លែង ដោយគ្មានការអនុញ្ញាតពីម្ចាស់ផ្ទះឡើយ ស្របពេលនោះដែរត្រូវម្ចាស់ផ្ទះឃើញទាន់ ក៏បានស្រែកថា«ចោរៗ» រួចបង្កឱ្យមានការភ្ញាក់ផ្អើល និងចាប់ខ្លួនតែម្តង ហើយប្រជាពលរដ្ឋសម្ដែងការខឹងសម្បារ ក៏នាំចោមរោមវាយទាត់ធាក់ រួចចាប់កោរសក់របស់នាងថែមទៀតផង ទោះបីជានាងបានលើកដៃសំពះអង្វរករ ដើម្បីសុំការលើកលែងទោសក្ដី ក៍មិនលើកលែងដែរ ។
ហើយ អ្នករស់នៅកន្លែងនោះ ថាតែងតែមានការបាត់ទូរស័ព្ទ និងបាត់កាបូបលុយជាបន្តបន្ទាប់ ប៉ុន្តែរកមុខចោរមិនដែលឃើញម្ដងណាឡើយ ទើបពេលនេះឃើញនារីខាងលើដើរចូលក្នុងផ្ទះ ទើបបានជាកំណត់ថា ជាចោរបម្រុងលួចទៀត ទើបមានការចាប់ខ្លួន និងមានហិង្សាហ្នឹងតែម្ដង។
ចំពោះនារីដែលគេសង្ស័យខាងលើនេះ ក្រៅពីការលើកដៃសំពះអង្វរសុំការលើកលែងទោស នាងក៏បានបដិសេធផងដែរថា មិនដែលធ្លាប់ធ្វើសកម្មភាពលួចរបស់អ្នកដទៃឡើយ។
បើតាមទំព័រហ្វេសប៊ុកមួយចេញមកបញ្ជាក់ច្បាស់ៗថា ពេលនេះសមត្ថកិច្ចបានចាត់កម្លាំងដើម្បីស្រាវជ្រាវទាក់ទិនរឿងនេះហើយ ដោយទំព័រហ្វេសប៊ុកនេះបានឲ្យដឹងថា «អុញនោះកុនហើយ ក្រុមអ្នកក្លាហានវាយយុវតីលួចទូរស័ព្ទដៃនៅផ្សារព្រៃទាហើយចាប់នាងកោរត្រងោលទៀតទោះនាងលើកដៃសំពះក៏មិនលើកលែងដែរ ឥឡូវនេះលោកវរៈសេនីយ៍ឯក យឹម សារ៉ាន់ អធិការខណ្ឌពោធិសែនជយ័ បានដឹកនាំកម្លាំងចុះស៊ើបអង្កេត និង ស្រាវជ្រាវយ៉ាងយកចិត្តទុកដាក់ហើយ»។