Saturday, September 1, 2018

ក្មេងមួយក្រុម ដើរឆ្លុះកង្កែបពេលយប់ ត្រូវពស់ចឹកចំភ្នែក ស្លាប់ម្នាក់

អាម៉ាប៉ាប៉ាញ៉ូស

បន្ទាយមានជ័យ:​ ក្មេងប្រុសម្នាក់ក្នុងចំណោមក្មេងៗច្រើននាក់ បានដួលផ្គាប់មុខស្លាប់យ៉ាងអាណោចអាធ័ម ខណ:ព្យាយាមរត់មកផ្ទះគ្រា ដែលត្រូវពស់ចឹកពេលកំពុងនាំគ្នាឆ្លុះកង្កែប ។ ហេតុការណ៍នេះបានកើតឡើងនៅម៉ោងប្រមាណ៩និង១០នាទីយប់ ថ្ងៃទី៣១ ខែសីហា ឆ្នាំ២០១៨ នៅចំណុចវាលស្រែក្បែរភូមិឱម៉ាល់ចាស់ (អតីតភូមិបត់ត្រង់) ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ។

មន្រីនគរបាលមូលដ្ឋានបាននិយាយថា​ ក្មេងៗទាំងនោះ រួមទាំងក្មេងរងគ្រោះ តែងតែចេញទៅវាលស្រែក្បែរភូមិជារៀងរាល់យប់ ដើម្បីឆ្លុះសត្វយកមកធ្វើម្ហូប តែអត់ដែលមានក្មេងណាម្នាក់រងគ្រោះនោះទេ ហើយជាទូទៅ ពួកក្មេងៗតែងតែបានមកវិញនូវសត្វកង្កែប​ កណ្តូប ហើយពេលខ្លះ ក៏វាយបានពស់មកផងដែរ ។ តែជាអកុល នៅយប់កើតហេតុ ក្មេងប្រុសរងគ្រោះ និងបក្ខពួក ទំនងជាកំពុងខ្វារក្នុងរន្ធកង្កែបហើយឆ្ងោកមើល ទើបបណ្តាលឲ្យពស់ចឹកចំភ្នែកខាងស្តាំ បណ្តាលឲ្យស្លាប់បែបនេះ ។

សមត្ថកិច្ចបានបញ្ជាក់ថា ក្មេងដែលរងគ្រោះ ​ឈ្មោះ ឈួត ក្ដៀប អាយុ១៥ឆ្នាំ ត្រូវពស់ចឹក និងដេកស្លាប់នៅក្រោមផ្ទះ របស់ឈ្មោះទួន ឈួន ភេទស្រី អាយុ៦៣ឆ្នាំ នៅភូមិជាមួយគ្នា ដែលស្ថិតនៅចុងភូមិ ។ ការដែលជនរងគ្រោះស្លាប់នៅក្រោមផ្ទះឈ្មោះឈួន នេះ គឺព្រោះតែព្យាយាមរត់មកផ្ទះខ្លូនឯង ដើម្បីឲ្យឪពុកម្តាយជួយ ។

បច្ចុប្បន្នសពកំពុងធ្វើបុណ្យនៅគេហដ្ឋាននៃសព៕

@Amapapa.News

Feature Ads