ថ្ងៃទី២៥ ខែកញ្ញា ឆ្នាំ២០១៨ មានហេតុការណ៍មួយបង្កឲ្យមានការភ្ញាក់ផ្អើលទាំងព្រឹកព្រលឹម នៅក្នុងស្ទឹងមេទឹក ដែនជម្រកសត្វព្រៃភ្នំសំកុស ស្ថិតក្នុងភូមិកណ្តាល ឃុំថ្មដា ស្រុកវាលវែង ខេត្តពោធិ៍សាត់ ដោយសារបុរសម្នាក់ បានប្រទះឃើញសត្វក្រពើ ដ៏ធំមួយក្បាល ជាប់មងដែលខ្លួនបានដាក់រកត្រី ក្នុងស្ទឹងមេទឹក។ នេះបើតាមហ្វេសប៊ុក ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន។
បុរសដែលប្រទះឃើញក្រពើនោះឈ្មោះ មឿន មីន ភេទប្រុស បានថ្លែងឱ្យដឹងថា រូបគាត់បានទៅរាយមងរកត្រី នៅចំណុចកើតហេតុខាងលើ រួចក៏ទៅសម្រាកនៅផ្ទះបាត់។ ពេលព្រឹកឡើង រូបគាត់ក៏ភ្ញាក់ពីដំណេក ទៅដោះមង ភ្លាមនោះ ក៏ប្រទះឃើញមងជាប់សត្វម៉្យាងដែលមានសភាពរើបម្រាស់ខ្លាំង ក៏លើកទាញឡើងប្រទះឃើញជាប់សត្វក្រពើដ៏ធំមួយក្បាល ទម្ងន់ប្រហែលជាង១០០គីឡូតែម្តង។
លោក មឿន មីន បានរាយការណ៍មកសមត្ថកិច្ច ឲ្យជួយអន្តរាគមន៍ លើកក្រពើរមួយក្បាលនោះមក។ លោកមានការភ្ញាក់ផ្អើលយ៉ាងខ្លះដោយនិយាយថា តាំងពីលោកប្រកបរបរដាក់មងរកត្រី នៅចំណុចស្ទឹងខាងលើ មិនដែលបានប្រទះឃើញសត្វក្រពើនោះឡើយ តែធ្លាប់តែឮតៗគ្នាថា ស្ទឹងមេទឹកមានធនធានជីវចម្រុះជាច្រើន រាប់ទាំងសត្វក្រពើរ ត្រី កន្ទាយ ផងដែរ។
របាយការណ៍របស់មន្ទីរព័ត៌មានខេត្តពោធិ៍សាត់បន្តថា៖ បច្ចុប្បន្នសត្វក្រពើនេះ ត្រូវបានដឹកយកមករក្សាទុក នៅទីបញ្ជាការវរការពារព្រំដែនគោកលេខ៨២៥ រងចាំបញ្ជាពីថ្នាក់លើ។ ពុំទាន់មានការសន្និដ្ឋានឲ្យដឹងនៅឡើយទេថា សត្វក្រពើនេះ ជាសត្វក្រពើធម្មជាតិរស់នៅក្នុងស្ទឹងនោះ ឬក៏រួចមកពីណានោះទេ។
