ភ្នំពេញៈ ជនជាតិវៀតណាម អូសនាមរកត្រីពេលយប់ បែរជាអូសបានសាកសពបុរសខ្មែរម្នាក់នៅក្នុងទន្លេ បង្កឲ្យមានការភ្ញាក់ផ្អើល កាលពីវេលាម៉ោង១និង៣០នាទីរំលងអធ្រាតឈានចូលថ្ងៃទី១១ ខែកញ្ញា ឆ្នាំ២០១៨ ស្ថិតក្នុងភូមិកណ្តាល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
សពបុរសខាងលើ ឈ្មោះ សំអាត សុចិត្រា ភេទប្រុស អាយុ១៩ឆ្នាំ អាសយដ្ឋានភូមិអូរអង្គុំ ឃុំអមលាំង ស្រុកថ្ពង ខេត្តកំពង់ស្ពឺ សពមានសភាពហើមធុំក្លិនស្អុយទៅហើយ។
ប្រភពព័ត៌មានពីស្ត្រីជនជាតិវៀតណាមម្នាក់ ឈ្មោះ ង្វៀង ធីណើ អាយុ២៦ឆ្នាំ បានឱ្យដឹងថា មុនពេលកើតហេតុ ពួកគាត់មានគ្នាបួននាក់ ប្រុស៣នាក់ ស្រីម្នាក់ បានអូសនាមពីស្ពានព្រែកព្នៅមកទិសខាងជើង មកដល់កន្លែងកើតហេតុ រើសត្រី ស្រាប់តែបើកនាមមើលត្រី ក៏ឃើញសាកសពមនុស្ស បង្កការភ្ញាក់ផ្អើល រួចក៏បានរាយការណ៍ប្រាប់មេភូមិកណ្តាល និងបានអូសសពមកក្រោយវត្តព្រែកព្នៅ។
ប្រភពព័ត៌មានពីមេភូមិកណ្តាល បានឱ្យដឹងថា បន្ទាប់ពីទទួលបានដំណឹងនេះ លោកបានរាយការណ៍ទៅសមត្ថកិច្ចឱ្យចុះមកពិនិត្យតែម្តង។ ក្រោយពីសមត្ថកិច្ចជំនាញធ្វើកោសលវិច័យរួចបញ្ជាក់ថា សពស្លាប់ដោយសារលង់ទឹក។ បច្ចុប្បន្នសពតម្កល់នៅវត្តព្រែកព្នៅបណ្តោះអាសន្នរង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕
