ភ្នំពេញៈ “ជីវិតមនុស្សនៅលើដងផ្លូវ ពិតជាប្រឈមនឹងគ្រោះថ្នាក់ខ្លាំងណាស់!” ជាក់ស្ដែងបុរសម្នាក់បានស្លាប់ ខណៈពេលកំពុងជិះតាមផ្លូវ ស្រាប់តែមានរថយន្ត(មិនស្គាល់ម៉ាក) បើកបុកពេញទំហឹង ហើយបើករត់គេចខ្លួនបាត់ស្រមោល បន្សល់ទុកសពជនរងគ្រោះដេកស្លាប់ លើដងផ្លូវយ៉ាងអាណោចអាធ័ម ក្រោមតំណក់ភ្លៀង បង្កការភ្ញាក់ផ្អើលដល់ប្រជាពលរដ្ឋចោមរោមមើលយ៉ាងច្រើន កាលពីវេលាម៉ោង៦៖២០នាទីព្រឹក ថ្ងៃចន្ទ ទី១៧ ខែកញ្ញា ឆ្នាំ២០១៨ ស្ថិតលើកំណាត់ជាតិលេខ៣ ចន្លោះគីឡូម៉ែត្រលេខ៣១-៣២ ក្នុងភូមិតាឡឹក ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល (ព្រំប្រទល់ខេត្តកណ្ដាល និងខេត្តកំពង់ស្ពឺ)។
សមត្ថកិច្ចបានឲ្យដឹងថា ជនរងគ្រោះ(សព)ឈ្មោះ ទិត បាន អាយុ៣១ឆ្នាំ ជិះម៉ូតូ Nex ពណ៌ស ពាក់ស្លាកលេខ តាកែវ 1N-7349 មានស្រុកកំណើតនៅម្ដុំផ្សារស័ង្កសី ឃុំព្រៃស្លឹក ស្រុកទាំង ខេត្តតាកែវ។
សាក្សីដែលឃើញហេតុការណ៍ផ្ទាល់ បានប្រាប់បណ្ដាញសារព័ត៌មាន CAM POST ថា នៅមុនកើតកើតហេតុ គេឃើញជនរងគ្រោះ ជិះម៉ូតូមួយគ្រឿង ម៉ាក Suzuki Nex ពណ៌ស ពាក់ស្លាកលេខ តាកែវ 1N-7349 ធ្វើដំណើរក្នុងល្បឿនធម្មតា ខណៈមកដល់កន្លែងកើតហេតុ ស្រាប់តែមានរថយន្តមួយគ្រឿង (មិនស្គាល់ម៉ាក) បើកយ៉ាងលឿនទៅបុកម៉ូតូជនរងគ្រោះ ហើយបើករត់គេចខ្លួនបាត់ស្រមោល បន្សល់ទុកសពជនរងគ្រោះដេកស្លាប់ លើដងផ្លូវយ៉ាងអាណោចអាធ័ម ក្រោមតំណក់ភ្លៀង បង្កការភ្ញាក់ផ្អើលដល់ប្រជាពលរដ្ឋចោមរោមមើលយ៉ាងច្រើន។
ក្រោយពេលកើតហេតុ សមត្ថកិច្ចមូលដ្ឋានបានចុះមកជួយសម្រួលចរាចរណ៍ ដើម្បីកាត់បន្ថយការកកស្ទះចរាចរណ៍ និងរាយការណ៍ទៅកាន់សមត្ថកិច្ចជំនាញស្រុកកណ្ដាលស្ទឹង ចុះមកធ្វើការវាស់វែង នឹងយកម៉ូតូទៅរក្សាទុកនៅអធិការដ្ឋាននគរបាលស្រុក ដើម្បីរងចាំសាច់ញាតិយកឯកសារ មកទទួលយកទៅវិញ។ ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ឲ្យក្រុមគ្រួសារដឹកតាមរថយន្តដឹកសព យកទៅធ្វើបុណ្យតាមប្រពៃណី៕