ឯកឧត្តម ញឹក ប៊ុនឆៃ ប្រធានគណបក្សខ្មែររួបរួមជាតិ ឋានៈស្មើទេសរដ្ឋមន្រ្តីបានដឹកនាំកិច្ចប្រជុំលើកដំបូងរបស់ឧត្តមក្រុមប្រឹក្សាពិគ្រោះ និងផ្តល់យោបល់ ក្នុងតួនាទីលោកជាប្រធានប្តូរវេន ដែលកិច្ចប្រជុំនេះបានរៀបចំនៅថ្ងៃទី២៧ ខែកញ្ញា ឆ្នាំ២០១៨ នៅវិមានសន្តិភាព ដើម្បីលើកឡើងពីលទ្ធផលការងារប្រចាំខែកញ្ញា របស់ប្រតិភូគណបក្សនីមួយៗ។
ជំនួបជាលើកដំបូងនេះធ្វើឡើងបន្ទាប់ពីសមាជិកឧត្តមក្រុមប្រឹក្សាពិគ្រោះ និងផ្ដល់យោបល់មួយចំនួនបានចុះបំពេញការងាររួចហើយនាពេលកន្លងមក។
លោក ពេជ្រ ស្រស់ ប្រធានគណបក្សយុវជនកម្ពុជា ឋានៈស្មើទេសរដ្ឋមន្រ្តី ដែលមានសកម្មភាពលេចធ្លោជាងគេ បានលើកយកបញ្ហាទំនាស់ដីធ្លីនៅក្នុងខេត្តកណ្ដាល និងការអនុវត្តការងារតាមមូលដ្ឋានមួយចំនួន របស់មន្រ្តីថ្នាក់ក្រោមជាតិ។
ជាមួយគ្នានេះផងដែរ លោក ញឹក ប៊ុន ឆៃ បានគូសបញ្ជាក់ថា អាជ្ញាធរថ្នាក់ក្រោមជាតិមួយចំនួននៅមិនទាន់ដឹងពីតួនាទី ភារកិច្ចរបស់ឧត្តមក្រុមប្រឹក្សាពិគ្រោះ និងផ្តល់យោបល់នៅឡើយទេ បើទោះបីជាស្ថាប័ននេះជាស្ថាប័នរបស់រដ្ឋធ្វើការងារបម្រើពលរដ្ឋក៏ដោយ។
យោងតាមលោក ឈឹម ផលវរុណ អគ្គលេខាធិការ នៃឧត្តមក្រុមប្រឹក្សាពិគ្រោះ និងផ្តល់យោបល់បានមានប្រសាសន៍ថា សមាជិក ឧត្តមក្រុមប្រឹក្សាពិគ្រោះ និងផ្តល់យោបល់ បានរកឃើញថាករណីជម្លោះដីធ្លីនៅតំបន់មួយចំនួននៅខេត្តកណ្តាល សៀមរាប និងខេត្តព្រះសីហនុជាដើម។
លោកបានបញ្ជាក់ថា បន្ទាប់ពីប្រមូលបានព័ត៌មាន និងទទួលសូំណូមពរពីប្រជាពលរដ្ឋដែលជាអ្នករងគ្រោះដីធ្លី រួច ហើយនោះ ឧត្តមក្រុមប្រឹក្សាពិគ្រោះ និងផ្តល់យោបល់នឹងផ្ញើរបាយការណ៍នេះ ជួនបន្តទៅសម្តេចតេជោហ៊ុន សែន នាយករដ្ឋមន្ត្រី។
អង្គប្រជុំបានសម្រេចថានឹងចេញអត្តសញាណប័ណ្ណសម្គាល់សមាជិក នៃឧត្តមក្រុមប្រឹក្សាពិគ្រោះ និងផ្តល់យោបល់ ដោយប្រើត្រាទីស្តីការគណរដ្ឋមន្ត្រីដើម្បីប្រើប្រាស់ទូទៅជាប្រយោជន៍ជាតិ និងប្រជាពលរដ្ឋ ហើយបន្តខិតខំធ្វើការសហការជាមួយអាជ្ញាធនៅពេលចុះបំពេញបេសកម្ម ដូចជាការជួនដំណឹង ពីពេលលវេលា ទីកន្លែងដែលត្រូវទៅបំពេញការងារជាដើម។
ជាគោលការណ៍ឧត្តមក្រុមប្រឹក្សានេះ នឹងបើកកិច្ចប្រជុំក្នុងមួយខែម្តង ពោលគឺនៅសប្តាហ៍ទី៤ នៃខែនីមួយៗដើម្បីបូកសរុប ការងារ និងផ្តល់យោបល់ទៅរាជរដ្ឋាភិបាលជុំវិញបញ្ហានានាដែលស្ថាប័ននេះ រកឃើញ។
សូមបញ្ជាក់ថា ប្រធានប្រតិភូនៃគណបក្សនីមួយៗ (១៦បក្ស) មានឋានៈស្មើទេសរដ្ឋមន្ត្រី ខណៈអនុប្រធានមានឋានៈស្មើរដ្ឋមន្ត្រី។