ភ្នំពេញៈ នគរបាលនាយកដ្ឋានព្រហ្មទណ្ឌក្រសួងមហាផ្ទៃ សហការជាមួយនគរបាលនាយកដ្ឋានកណ្តាលសន្តិសុខ និងកម្លាំងនគរបាលរាជធានីភ្នំពេញ បានរួមដៃគ្នា បើកប្រតិបត្តិការតាមបង្ក្រាប ក្រុមចោរប្លន់ប្រដាប់អាវុធ២នាក់ ក្នុងចំណោមបក្ខពួកចំនួន៣នាក់ ដែលបានប្លន់ទ្រព្យសម្បត្តិយ៉ាងសកម្ម នៅក្នុងភូមិសាស្ត្រ រាជធានីភ្នំពេញ រួមទាំងដកហូតបានកាំភ្លើងខ្លីចំនួន២ដើម និងវត្ថុតាងផ្សេងៗទៀតមួយចំនួន។
ប្រតិបត្តិការបង្ក្រាបក្រុមជនសង្ស័យខាងលើនេះ បានធ្វើឡើងនៅថ្ងៃទី១១ ខែកញ្ញា ឆ្នាំ២០១៨ ធ្វើឡើងក្រោមការបញ្ជាផ្ទាល់ពីសំណាក់ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ, លោកឧត្តមសេនីយ៍ឯក អ៊ិន បូរ៉ា ប្រធាននាយកដ្ឋានកណ្តាលនគរបាលយុត្តិធម៌ និងដឹកនាំដោយលោកឧត្តមសេនីយ៍ឯក ងេង ជួរ ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ។
លោក ជាវ វិបុល ក្នុងនាមនាយកដ្ឋានព្រហ្មទណ្ឌទាំងមូល បានប្រាប់ឲ្យដឹងនៅព្រឹកថ្ងៃទី១៤ ខែកញ្ញា ឆ្នាំ២០១៨នេះថា ជនសង្ស័យទី១ ឈ្មោះ តាំង រុន អាយុ៣១ឆ្នាំ មុខរបរមិនពិតប្រាកដ មានទីលំនៅស្រុកកំពង់ត្របែក ខេត្តព្រៃវែង និងទី២ ឈ្មោះ ឡា ធារ៉ា អាយុ២៤ឆ្នាំ មុខរបរមិនពិតប្រាកដ មានទីលំនៅភូមិរកាកោង ឃុំរកាកោង ស្រុកមុខកំពូល ខេត្តកណ្តាល។
លោក ជាវ វិបុល បានឲ្យដឹងទៀតថា ចំពោះវត្ថុតាងដកហូតបានរួមមាន ៖ ម៉ូតូចំនួន២គ្រឿង (សេ១២៥ មួយគ្រឿង និងម៉ូតូម៉ាកស្កុបពី១គ្រឿង), អាវុធខ្លីចំនួន២ដើម (ម៉ាករ៉ូឡូ១ដើម និងមេអាកុល១ដើម និងម្សៅពណ៌សមួយកូនកញ្ចប់។
តាមរបាយការណ៍របស់សមត្ថកិច្ច បានឲ្យដឹងថា ក្រុមជនសង្ស័យកាលពីថ្ងៃទី៨ ខែកញ្ញា ឆ្នាំ២០១៨ថ្មីៗនេះ បានប្លន់ទ្រព្យសម្បត្តិស្ត្រីជាអ្នករកស៊ីរាប់លុយ នៅក្នុងផ្សារឈូកមាស សង្កាត់គោកឃ្លៀង ខណ្ឌសែនសុខ រាជធានីភ្នំពេញ ដោយដកកាំភ្លើងខ្លីវាយក្បាលជនរងគ្រោះ បណ្តាលឲ្យបែកក្បាល ដើម្បីប្លន់ទ្រព្យសម្បត្តិបានប្រាក់ដុល្លារ ចំនួន១៧០០០ម៉ឺនដុល្លារ និងប្រាក់រៀលចំនួន១០លានរៀល ហើយរត់គេចខ្លួនបាត់ទៅ ។
បន្ទាប់មកសមត្ថកិច្ចបានស្រាវជ្រាវហើយក៏រកឃើញក្រុមជនដៃដល់ចំនួន២នាក់ ហើយក៏ចាប់ខ្លួនបញ្ជូនមមតុលាការ ដើម្បីចាត់ការតាមច្បាប់៕
