ឯកឧត្តម ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលតាមដានយ៉ាងចិត្តទុកដាក់លើកំណែនិងស្រង់ពិន្ទុ បានវាយតម្លៃវិជ្ជមានលើលទ្ធផលប្រឡង ដោយអះអាងថាសិស្សជាប់និទ្ទេសAឆ្នាំនេះ នឹងកើនឡើងច្រើនជាងឆ្នាំមុន ព្រោះតែឯកឧត្តម ហង់ ជួន ណារ៉ុន មើលឃើញថាការរឹតបន្តឹងការប្រឡង៥ឆ្នាំនេះ បានធ្វើឱ្យបេក្ខជនប្រឡងបាក់ឌុបទាំងអស់ ប្រឹងប្រែងសិក្សាខ្លាំង ដើម្បីទទួលបាននិទ្ទេសល្អ។
រដ្ឋមន្ត្រីក្រសួងអប់រំរូបនេះបានបន្ថែមថា៖ លទ្ធផលប្រឡងអាចនឹងប្រកាសមុនការកំណត់ ពោលគឺនៅថ្ងៃទី៩ និង១០ ខែកញ្ញាវិញ បើសិនជាការបូកសរុបពិន្ទុនេះ លឿនជាងការគ្រោងទុក។
ឯកឧត្តមបានថ្លែងបន្តទៀតថា៖ ខ្ញុំមានជំនឿជឿជាក់ថា ដោយសារសិស្សយើងខំប្រឹងរៀនជាង៥ឆ្នាំមកហើយ ដូចនេះនិទ្ទេសA ប្រហែលជាច្រើនជាងមុន កាលមុនយើងមាន៤២៤នាក់។
ក្រសួងអប់រំ យុវជន និងកីឡា បានកំណត់សម្រាប់ពិន្ទុនិទ្ទេសA ៤២៧ពិន្ទុ ដែលស្មើនឹង៩០ភាគរយ និទ្ទេស B ត្រូវ ៣៨០ពិន្ទុ ដែលស្មើ៨០ភាគរយ និទ្ទេស C ៣៣២ពិន្ទុ ដែលស្មើ៧០ភាគរយ និទ្ទេស D ២៨៥ពិន្ទុ ស្មើនឹង៦០ភាគរយ និងនិទ្ទេសE ២៣៧ពិន្ទុ ស្មើនឹង៥០ភាគរយ នៃពិន្ទុប្រឡងអតិបរមា៥០០ពិន្ទុ។
តាមគម្រោងក្រសួងនឹងប្រកាសលទ្ធផលប្រឡងនៅថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល ចំណែកឯនៅថ្ងៃទី១២ ខែកញ្ញា ឆ្នាំ២០១៨ សម្រាប់មណ្ឌលប្រឡងតាមបណ្តាខេត្ត។
សូមរំលឹកថា កាលពីឆ្នាំ២០១៧ មានសិស្សជាប់និទ្ទេស A មានចំនួន ៤២៤នាក់ និទ្ទេស B មានចំនួន ២ ៤៦៤នាក់ និទ្ទេស C មានចំនួន ៥០០០នាក់ និទ្ទេស D មានចំនួន ៩១២៣នាក់ និងនិទ្ទេស E មានចំនួន ៤៦ ៦៥៧នាក់។