Wednesday, September 5, 2018

នៅផ្សារប្រសូត្រ កាំកុងត្រូល ខេត្តស្វាយរៀង រកឃើញចាហ៊ួយសង្ស័យដាក់ជាតិប្លាស្ទិក ៣៧.៥គីឡូ នាំចូលពីប្រទេសវៀតណាម

ភក្ដី

(ស្វាយរៀង)៖ នៅថ្ងៃទី៥ ខែកញ្ញាឆ្នាំ២០១៨នេះ លោក ផឹង និល ប្រធានសាខាកាំកុងត្រូល ខេត្តស្វាយរៀង សហការជាមួយមន្ទីរពាណិជ្ជកម្ម ខេត្តស្វាយរៀង  បានដឹកនាំមន្ត្រីក្រោមឱវាទ ចុះពិនិត្យទំនិញបន្លែផ្លែឈើ នៅទីតាំងផ្សារប្រសូត្រ ស្រុកស្វាយទាប និងផ្សារជីភូ ក្រុងបាវិត ក្នុងនោះបាន រកឃើញចាហ៊ួយសង្ស័យ ដាក់ជាតិប្លាស្ទិកចំនួន១៥កាឡ ស្មើនិង៣៧.៥គីឡូក្រាម និងទំនិញខូចគុណភាពជាច្រើនមុខទៀត ដែលដាក់តាំងលក់នៅផ្សារប្រសូត្រ ស្រុកស្វាយទាបនិងផ្សារជីភូ ក្រុងបាវិត ខេត្តស្វាយរៀង ហើយបានដកហូត យកទៅពិសោធន៍និងដុតកម្ទេចចោល ។

លោកបានបញ្ជាក់ទៀតថា មន្ត្រីជំនាញ​បានធ្វើការ ចុះពិនិត្យមុខទំនិញជាច្រើនមុខ ក្នុងទីតាំងផ្សាប្រសូត្រនិងផ្សារជីភូ នាពេលនេះ បានរកឃើញចាហ៊ួយចំនួន១៥កាឡ ស្មើនិង៣៧.៥គីឡូ ព្រោះប្រភេទចាហ៊ួយនេះ នាំចូលពីប្រទេសជិតខាង វាមានជាតិរឹងស្វិត ដែលបង្ករអោយប៉ះពាល់ដល់ក្រពះ ពោះវៀនយ៉ាងធ្ងន់ធ្ងរ ខណៈដែលយើងបានបរិភោគវា ជាពិសេសនោះក្មេងៗតូច ពិតជាគ្រោះថ្នាក់ខ្លាំងណាស់ ។ 

ហើយក្នុងនោះ ក៏បានរកឃើញទំនិញ ហួសកាលបរិច្ឆេតមួយ ចំនួនទៀតផងដែរ មន្ត្រីជំនាញបានធ្វើតេស្ត ទៅលើមុខទំនិញជាច្រើនមុខ មានដូចជាបន្លែ ផ្លែឈើ ផ្អក ប្រហុក ជ្រក់ សណ្តែកបណ្តុះ ឈាមគោ។ល។
ប៉ុន្តែពុំមិនបានរកឃើញ ផ្ទុកសារធាតុគីមីនោះទេ ចំណែកអ្នកលក់​ក៏បានយល់ព្រម បញ្ឈប់ការដាក់លក់ទំ​និញ ដែលខូចគុណភាព ហួសការបរិច្ឆេទប្រើប្រាស់ ព្រោះពួកគេទាំងអស់នោះ​ បានយល់ដឹង នូវផលប៉ះ​ពាល់ដល់​សុខភាព នៅពេលដែលប្រើប្រាស់ ទំ​និញដែលខូចគុណភាព ។

លោក ផឹង និល ក៏បានអំពាវដល់ប្រជាពលរដ្ឋទាំងអស់ នៅខេត្តស្វាយរៀង សូមមានការប្រុងប្រយ័ត្ន ចំពោះការបរិភោគ ចំណីអាហារ ត្រូវពិនិត្យមើល​ស្លាកសញ្ញាកាលបរិច្ឆេទ​ ឲ្យបានច្បាស់លាស់ មុន​ទិញយកទៅបរិភោគ ដើម្បីចូលរួម លើកកម្ពស់សុខុមាលភាពទាំងអស់គ្នា ហើយមន្ត្រីកាំកុងត្រូល នឹងបន្តចុះ​ពិនិត្យទំនិញនៅតាមផ្សារនានា នៅក្នុងខេត្ត ស្វាយរៀង ឲ្យបានញឹកញាប់បន្ថែមទៀតផងដែរ ។
 

@Amapapa.News

Feature Ads