នៅរសៀលថ្ងៃសុក្រ ១២កើត ខែភទ្របទ ឆ្នាំរច សំរឹទ្ធិស័ក ព.ស ២៥៦២ ត្រូវនឹងថ្ងៃទី២១ ខែកញ្ញា ឆ្នាំ២០១៨ នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញទទួលជួបពិភាក្សាការងារជាមួយ លោក Luong Cuong ប្រធានអគ្គស្នងការនយោបាយនៃកងទ័ពវៀតណាម ដែលបានធ្វើឡើងនៅវិមានសន្តិភាព។ នេះបើតាមការចុះផ្សាយរបស់សម្តេចចនាយករដ្ឋមន្ត្រី។
ក្នុងជំនួបពិភាក្សាការងារនេះ លោក Luong Cuong បាននិយាយថា៖ នេះជាលើកទីមួយហើយដែលគាត់បានដឹកនាំគណៈប្រតិភូអគ្គស្នងការនយោបាយនៃកងទ័ពវៀតណាមមកកាន់ព្រះរាជាណាចក្រកម្ពុជា។
មុននឹងជួបពិភ្សាការងារជាមួយសម្តេច ហ៊ុន សែន លោក Luong បានជួបពិភាក្សាការងារជាមួយសម្ដេចពិជ័យសេនា ទៀបាញ់ រដ្ឋមន្ត្រីក្រសួងការពារជាតិកម្ពុជា។
ក្នុងដំណើរមកកម្ពុជាជាលើកដំបូងនេះ លោក Luong ក៍បានធ្វើទស្សនកិច្ចនៅកងពលតូចលេខ ៧០ និងជួបពិភាក្សាការងាររួមគ្នាដើម្បីវាយតម្លៃពីស្ថានភាពនយោបាយ លើពិភពលោក និងស្ថានភាពនយោបាយក្នុងតំបន់ និងការប្រឈមទាំងឡាយ ព្រមទាំងការរួមគ្នាដើម្បីពង្រឹងមិត្តភាពធ្វើយ៉ាងណារក្សាឱ្យបាននូវសុខសន្តិភាព ស្ថេរភាព និងការអភិវឌ្ឍសម្រាប់ប្រទេសទាំងពីរ ជាពិសេសតាមរយៈការផ្លាស់ប្ដូរបទពិសោធន៍ ការផ្លាស់ប្ដូរព័ត៌មាន ការអភិវឌ្ឍធនធានមនុស្ស និងការផ្លាស់ប្តូរទស្សនកិច្ចរវាងភាគីទាំងពីរ។
ចំណែកឯ សម្ដេចតេជោ បានសំដែងនូវការចូលរួមសោកស្ដាយចំពោះមរណភាព របស់លោកប្រធានាធិបតីវៀតណាម សម្តេច ហ៊ុន សែន ក៏បានគាំទ្រផងដែរ ចំពោះរបាយការណ៍ និងការលើកទឹកចិត្ត ដល់ការអនុវត្តលើអ្វី ដែលសម្រេចបានហើយជូនពរឱ្យទទួលបានជោគជ័យ។
ចុងបញ្ចប់នៃជំនួបនេះ សម្ដេចអគ្គមហាសេនាបតីតេជោ ហ៊ុន សែន បានថ្លែងអំណរគុណ ជូនចំពោះប្រជាពលរដ្ឋ និងរដ្ឋាភិបាលវៀតណាម ដែលកន្លងមកបានជួយដល់កម្ពុជា ភាពរស់រានមានជីវិត និងភាពរុងរឿងរបស់កម្ពុជា មិនអាចកាត់ផ្ដាច់បាន ពីការចូលរួមចំណែករបស់វៀតណាមបានឡើយ។
