ថៃៈ រថយន្តផ្ទុះកង់ក្រឡាប់ បង្កឲ្យពលករខ្មែរ២នាក់បានស្លាប់ និងរបួសធ្ងន់៤នាក់ កាលពីថ្ងៃទី២១ ខែកញ្ញា ឆ្នាំ២០១៨ វេលាម៉ោង៥ល្ងាច ស្ថិតនៅស្រុកកាប៊ីនបូរី ខេត្តប្រាជីនបូរី ប្រទេសថៃ ។
យោងសមត្ថកិច្ចកម្ពុជាដែលស្រង់ប្រភពព័ត៌មានពីសមត្ថកិច្ចថៃឲ្យដឹងថា ពលករខ្មែរដែលជួបគ្រោះថ្នាក់ចរាចរណ៍បណ្តាលស្លាប់៖ ១- ឈ្មោះ ម៉ៅ ម៉ូលីកា ភេទស្រី អាយុ៣០ឆ្នាំ មានទីលំនៅភូមិខ្នាសង្កាត់ជ្រៀវ ក្រុងសៀមរាប ខេត្តសៀមរាម ។ ២.ឈ្មោះ ដុក លីដា ភេទស្រី អាយុ២០ឆ្នាំ មានទីលំនៅភូមិឫស្សីក្រោកស្រុកមង្គលបុរី ខេត្តបន្ទាយមានជ័យ ។ អ្នករងរបួស ឈ្មោះកេត គន្ធា ភេទស្រី អាយុ២០ឆ្នាំ មានទីលំនៅភូមិសង្កាត់បឹងទំពុន ខណ្ឌមានជ័យ រាជធានីភ្នំពេញ របួសបាក់ចង្កេះ, ២.ឈ្មោះ សុង ពិសី ភេទស្រី អាយុ១៨ឆ្នាំ មានទីលំនៅភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប របួសភ្នែកឆ្វេង ។ ៣- ឈ្មោះ ជា ស៊ុយលី ភេទស្រី អាយុ២៤ឆ្នាំ មានទីលំនៅភូមិកិត្តិយស ឃុំព្រៃជ្រូក ស្រុកពួក ខេត្តសៀមរាប របួសជើង ។ ៤.ឈ្មោះ រឹទ្ធ សុលាភ ភេទប្រុស អាយុ២១ឆ្នាំមានទីលំនៅភូមិមណ្ឌល ឃុំស្វាយដង្គុម ក្រុងខេត្តសៀមរាប របួសក្បាល ។
សមត្ថកិច្ចថៃបានបញ្ជាក់ឲ្យដឹងទៀតថា នៅមុនពេលកើតហេតុនោះ ពលករខ្មែរចំនួន៦នាក់ ធ្វើដំណើរតាមរថយន្តឈ្នួល ដើម្បីទៅទិញឥវ៉ាន់ នៅទីក្រុងបាងកក ។ លុះបើកមកដល់ចំណុចកើតហេតុ រថយន្តផ្ទុះកង់បណ្តាលឲ្យក្រឡាប់ធ្លាក់ចូលស្នាមភ្លោះ ។
ក្រោយពេលសមត្ថកិច្ចថៃទៅដល់កន្លែងកើតហេតុ និងជួយយកមនុស្សចេញពីរថយន្ត ប៉ុន្តែគួរឲ្យសោកស្តាយពលករខ្មែរបានស្លាប់២នាក់ទៅហើយ និង៤នាក់ទៀតរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យក្នុងប្រទេសថៃ ចំណែកអ្នកស្លាប់ ត្រូវបានអគ្គកុងស៊ុលកម្ពុជា ប្រចាំប្រទេសថៃ រៀបចំបែបបទបញ្ជូន មកប្រទេសកម្ពុជាវិញ តាមច្រកអន្តរជាតិប៉ោយប៉ែតជាបន្តបន្ទាប់ ដើម្បីប្រគល់សពទៅឲ្យក្រុមគ្រួសាយកទៅធ្វើបុណ្យតាមប្រពៃណី៕