ភ្នំពេញៈ ទីតាំងលួចលាក់បើកហ្គេមបាញ់ត្រីមួយកន្លែង ប្រមូលផ្តុំទៅដោយក្រុមជួញដូរ និងប្រើប្រាស់ថ្នាំញៀនផងដែរ ត្រូវបានកម្លាំងសមត្ថកិច្ចចម្រុះ ស្លៀកពាក់ស៊ីវិល ឆ្មក់ចូលបង្ក្រាប និងធ្វើការឃាត់ខ្លួនមនុស្សប្រុសស្រីបាន៥-៦នាក់ (នារី២នាក់ ជាអ្នកមើលការខុសត្រូវទីតាំងខាងលើផងដែរ) រួចបញ្ជូនឡើងលើរថយន្តជាបន្តបន្ទាប់គ្នា។
ករណីបង្ក្រាបខាងលើនេះ ធ្វើឡើងនៅវេលាម៉ោង១០យប់ ថ្ងៃទី១៨ ខែកញ្ញា ឆ្នាំ២០១៨ នៅត្រង់ចំណុចផ្ទះល្វែងមួយកន្លែង នៅតាមបណ្ដោយផ្លូវ៣៧១ ជិតគ្លីនិកសួគា៍ ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេឃើញក្មេងប្រុសជំទង់ៗនាំគ្នាមកពពាក់ពពួនគ្នាក្នុងផ្ទះល្វែងខាងលើ ដែលជាទីតាំងលួចលាក់បើកហ្គេមបាញ់ត្រី យ៉ាងសប្បាយ ដោយមានប្រមូលផ្តុំទៅដោយក្រុមជួញដូរ និងប្រើប្រាស់ថ្នាំញៀនផងដែរ លុះដល់វេលាកើតហេតុខាងលើ ក៏កម្លាំងសមត្ថកិច្ចចម្រុះមួយក្រុម ស្លៀកពាក់ស៊ីវិល បានឆ្មក់ចូលទីតាំងខាងលើនេះ រួចធ្វើការឃាត់ខ្លួនមនុស្សប្រុសស្រីបាន៥-៦នាក់ (មាននារី២នាក់ ជាអ្នកមើលការខុសត្រូវទីតាំងខាងលើផងដែរ) រួចបញ្ជូនឡើងលើរថយន្តជាបន្តបន្ទាប់គ្នា។
ក្រោយកើតហេតុសមត្ថកិច្ចបាននាំខ្លួនជនសង្ស័យប្រុសស្រីទាំងនោះ ឡើងលើរថយន្តរួចបើកចេញពីកន្លែងកើតហេតុបាត់អស់ បន្សល់ទុកតែទូហ្គេមបាញ់ត្រីនៅក្នុងផ្ទះល្វែងនោះប៉ុណ្ណោះ៕
