ភ្នំពេញៈ រថយន្ត Range Rover ស៊េរីទំនើបមួយគ្រឿង ឆាបឆេះចេញជាអណ្ដាតភ្លើងឡើង បង្កជាការភ្ញាក់ផ្អើលដល់សន្តិសុខ NaGa World 1 នាំគ្នាទាញបំពង់ពន្លត់អគ្គិភ័យ និងទុយោទឹកមកជួយបាញ់ពន្លត់ហុយផ្សែងទ្រលោម ផ្អើលទាំងប្រជាពលរដ្ឋឈប់ចោមរោមមើលពេញដងផ្លូវ កាលពីវេលាម៉ោង២៖២០នាទីទាបភ្លឺ ថ្ងៃទី៥ ខែកញ្ញា ឆ្នាំ២០១៨ នៅមុខមជ្ឈមណ្ឌលកម្សាន្តណាហ្គាវើលទី១ (NaGa World 1) ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បើតាមសន្តិសុខម្នាក់ បានបង្ហើបប្រាប់ថា គាត់ក៏មិនដឹងច្បាស់ពីមូលហេតុ នៃការឆេះរថយន្តនោះទេ តែគ្រាន់ដឹងថា រថយន្តដែលឆាបឆេះម៉ាក Range Rover ពណ៌ស ពាក់ស្លាកលេខ ភ្នំពេញ 2Y-5161 ម្ចាស់រថយន្តមិនត្រូវបានស្គាល់អត្តសញ្ញាណច្បាស់ទេ គ្រាន់តែដឹងថា ជាជនជាតិខ្មែរ និងជាអ្នកមានអំណាច បុណ្យស័ក្តិម្នាក់ នៅក្នុងរាជធានីភ្នំពេញយើងនេះ ហើយក៏ជាភ្ញៀវVIP ប្រចាំមជ្ឈមណ្ឌលកម្សាន្តណាហ្គាវើលនេះផងដែរ។
មុនមានការភ្ញាក់ផ្អើលសាក្សីដែលបើករថយន្តមកចតចាំភ្ញៀវែក្បរនោះ បានប្រាប់ CAM POST ថា គឺរថយន្តនោះបានបើកមកឈប់នៅមុខណាហ្គាវើរ ហើយម្ចាស់រថយន្តបានដើរចូលទៅខាងក្នុងបាត់ មួយសន្ទុះក្រោយមក ស្រាប់តែមានផ្សែងហុយចេញពីក្បាលរថយន្ត ឃើញដូច្នោះពួកគាត់ជាក្រុមសន្តិសុខ បានទាញយកបំពង់ពន្លត់អគ្គិភ័យចេញមកជួយបាញ់ពន្លត់អស់២០បំពង់ ហើយភ្លើងនៅតែមិនរលត់ក៏ត្រូវខាងក្រុមបុគ្គលិកពន្លត់អគ្គិភ័យប្រចាំនៅទីនោះផ្ទាល់ទាញទុយោទឹកចេញពីខាងក្នុងមកជួយបាញ់បន្ថែមទៀត ទើបភ្លើងបានរលត់ទៅវិញភ្លាមៗទាន់ពេលវេលា និងបណ្តាលឲ្យរថយន្តខូចខាតតែតួម៉ាស៊ីនតែប៉ុណ្ណោះ។ ក្នុងហេតុការណ៍នោះម្ចាស់រថយន្តផ្ទាល់ក៏មិនបានចេញពីខាងក្នុងមកមើលរថយន្តខ្លួនទេ ហើយមូលហេតុដែលបង្កឲ្យឆេះគ្មានប្រភពណាដឹងច្បាស់ថា មកពីមូលហេតុអ្វីទេ។
ក្រោយកើតហេតុ រថយន្តដែលឆាបឆេះនេះ ត្រូវបានក្រុមសន្តិសុខជួយពន្លត់បានទាន់ពេលវេលា ហើយក៏មានតំណាងម្ចាស់រថយន្តចេញមុខមកដោះស្រាយ ដោយបានទាក់ទងហៅរថយន្តស្ទូចមកស្ទូចយកទៅជួសជុលដោយខ្លួនឯង៕
