ពោធិ៍សាត់ៈ រថយន្ត LUXUS RX300 មួយគ្រឿង ពណ៌ស ពាក់ស្លាកលេខ ភ្នំពេញ 2AB-4180 ធ្វើដំណើរពីបាត់ដំបង ឆ្ពោះទៅភ្នំពេញ បើកបរដោយក្រុមជនជាតិចិន មានគ្នា៥នាក់ ខណៈកំពុងតែបើកសុខៗ ស្រាប់តែផ្ទុះធុងហ្គាសឆាបឆេះ បណ្ដាលឲ្យជនជាតិចិនទាំងនោះ រងរបួសធ្ងន់ស្រាល។
ករណីផ្ទុះឆេះរថយន្តខាងលើនេះ បានកើតឡើងកាលពីវេលាម៉ោង១២៖៤០នាទីយប់ថ្ងៃសុក្រ ៤រោច ខែភទ្របទ ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី២៨ ខែកញ្ញា ឆ្នាំ២០១៨ លើស្ពានធ្លាម្អម កំណាត់ផ្លូវជាតិលេខ៥ ចន្លោះគីឡូម៉ែត្រលេខ១៧០-១៧១ ស្ថិតនៅភូមិត្រាំ ឃុំត្នោតជុំ ស្រុកក្រគរ ខេត្តពោធិ៍សាត់ ។
ករណីនេះផងដែរ រថយន្តត្រូវបានភ្លើងឆេះខ្ទេចទាំងស្រុង និងបណ្ដាលឲ្យមនុស្សរងរបួសធ្ងន់២នាក់ប្រុស រងបួសស្រាល៣នាក់ប្រុស ត្រូវបានបញ្ជូនទៅកាន់មន្ទីរពេទ្យបង្អែកខេត្តពោធិ៍សាត់។
បញ្ជាក់ ៖ ជនជាតិចិន មិនបានស្គាល់ឈ្មោះទេ ព្រោះពួកគាត់ចេះតែភាសារចិន មិនចេះអង់គ្លេសទេ ទើបកម្លាំងយើងសាកសួរព័ត៌មានមិនបាន ។
ក្រោយកើតហេតុសមត្ថកិច្ចបានចុះអន្តរាគមន៍ ដោយប្រើប្រាស់រថយន្តពន្លត់អគ្គិភ័យអស់១គ្រឿង ទើបបាញ់ពន្លត់អគ្គិភ័យនេះបាន។ បច្ចុប្បន្នរថយន្ត ដែលឆេះនោះ កម្លាំងនគរបាលស្រុក និងប៉ុស្តិ៍បានអូសដាក់ទុកនៅពីខាងមុខប៉ុស្តិ៍នគរបាលត្នោតជុំ៕
