ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ ហៅកាត់ថាUSAID បានផ្តល់ប្រាក់ចំនួន២១លានដុល្លារ ដល់ក្រុមហ៊ុន Tetra Tech ដោយធ្វើកិច្ចសន្យារយៈពេល ៥ឆ្នាំ ដើម្បីរកដំណោះស្រាយបច្ចេកទេស កែលម្អការអភិរក្សធនធានធម្មជាតិ និងពង្រឹងការអភិវឌ្ឍប្រកបដោយចីរភាពនៅតំបន់ព្រៃឡង់។
គម្រោងថវិកា២១លានដុល្លារ របស់ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិទៅឱ្យក្រុមហ៊ុន Tetra Tech គ្រប់ដណ្តប់លើផ្ទៃដី ៥លាន ហិចតា ដើម្បីអភិរក្សធនធានជីវជម្រុះក្នុងតំបន់ព្រៃឡង់ ស្ថិតនៅក្នុងខេត្តចំនួន៤ គឺខេត្តស្ទឹងត្រែង ក្រចេះ ព្រះវិហារ និងកំពង់ធំ។ ព្រៃឡង់ជាតំបន់ទេសភាពបៃតងចុងក្រោយនៅតំបន់អាស៊ីអាគ្នេយ៍ ដែលកំពុងរងការកាប់បំផ្លាញជាបន្តបន្ទាប់។
បើតាមលោក សេង សុខេង អ្នកសម្របសម្រួលបណ្តាញកសាងសន្តិភាពសហគមន៍អះអាងថា ធនធានធម្មជាតិ និងជិវចម្រុះនៅតំបន់ព្រៃឡង់កំពុងរងការគំរាមកំហែងទៅរកការបាត់បង់ព្រៃឈើ សត្វព្រៃកម្រ និងការប្រែប្រួលអាកាសធាតុ ដោយសារការកាប់បំផ្លាញ់ព្រៃឈើដើម្បីជួញដូរ និងបរបាញ់សត្វព្រៃលក់ក្នុងទីផ្សារងងឹត។
ប៉ុន្តែ លោក សេង សុខេង សាទរចំពោះជំនួយមូលនិធិរាប់លានដុល្លារអាមេរិក ដើម្បីអភិរក្សព្រៃឈើ និងសត្វព្រៃនៅព្រៃឡង់ ហើយជំរុញឱ្យម្ចាស់មូលនិធិធ្វើការសហការណ៍ជាមួយក្រុមសហគមន៍ការពារព្រៃឡង់ ដើម្បីការពារព្រៃឈើ និងសត្វព្រៃឱ្យមានប្រសិទ្ធភាព។
សូមបញ្ជាក់ថា៖ ក្រុមហ៊ុន Tetra Tech ជាក្រុមហ៊ុនផ្តល់សេវាកម្មវិស្វកម្មដែលមានមូលដ្ឋាននៅរដ្ឋកាលីហ្វ័រញ៉ា សហរដ្ឋអាមេរិក ក្នុងការរកដំណោះស្រាយបច្ចេកទេសកែលម្អ និងលើកកម្ពស់ការអភិរក្សជីវចម្រុះ ប្រកបដោយនិរន្តភាពនិងភាពរឹងមាំនៅតំបន់ព្រៃឡង់កម្ពុជា។