ក្រសួងអប់រំ យុវជន និងកីឡា បានអះអាងប្រាប់ដល់សាធារណជនថា ដំណើរការប្រឡងជ្រើសរើសគ្រូបង្រៀនគ្រប់កម្រិត ប្រព្រឹត្តទៅដោយប្រក្រតី ស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ យោងតាមសេចក្ដីប្រកាសព័ត៌មានចុះថ្ងៃទី០២ តុលា ឆ្នាំ២០១៨ របស់ក្រសួងអប់រំ យុវជន និងកីឡា។
សេចក្ដីប្រកាសព័ត៌មានដដែលបានលើកឡើងថា៖ នាពេលថ្មីៗនេះ មានការលេចព័ត៌មានថា មានករណីបុគ្គលមួយចំនួនបានដើរសន្យាជួយដល់បេក្ខជនប្រឡងជ្រើសរើសចូលមប្រើជាគ្រូបង្រៀនគ្រប់កម្រិត ឱ្យប្រឡងជាប់ដោយថ្នូរនឹងថវិកាមួយចំនួន។
ជាមួយគ្នានេះដែរ ក្រសួងអប់រំ យុវជន និងកីឡា ដែលមានឯកឧត្តម ហង់ ជួន ណារ៉ុន ជារដ្ឋមន្រ្តី ក៏អំពាវនាវដល់មាតាបិតា អ្នកអាណាព្យាបាល និងបេក្ខជនទាំងអស់កុំចាញ់បោកពាក្យភូតកុហករបស់ជនឆ្លៀតឱកាសណាមួយ ដែលនាំឱ្យខាតបង់ថវិកា និងទ្រព្យសម្បត្តិជាអសារបង់។ ម្យ៉ាងទៀត ក្រសួងបានអំពាវនាវឱ្យបេក្ខជនទាំងអស់ខិតខំបញ្ចេញសមត្ថភាពនិងគោរតាមបទប្បញ្ញតិនានាក្នុងដំណើរការប្រឡងជ្រើសរើសនេះ។
ជាងនេះទៅទៀត ក្រសួងសន្យាថានឹងចាត់វិធានការយ៉ាងម៉ឺងម៉ាត់ ចំពោះជនទាំងឡាយណាដែលបានប្រព្រឹត្តនូវអំពើខុសច្បាប់ឱ្យមកទទួលទោសតាមច្បាប់ជាធរមាន។
ដើម្បីឈានទៅទប់ស្កាត់នូវបាតុភាពមិនប្រក្រតី និងចាត់វិធានការទាន់ពេលវេលាចំពោះជនឆ្លៀតឱកាសណាមួយនោះ ក្រសួងអប់រំស្នើសុំកិច្ចសហការពីមាតាបិតា អ្នកអាណាព្យាបាល បេក្ខជន និងសាធារណជនទាំងអស់មេត្តាផ្តល់ព័ត៌មាននិងអត្តសញ្ញាណជនប្រព្រឹត្តកំហុសទាំងនោះមកក្រសួងតាមគ្រប់មធ្យោបាយ ដោយក្រសួងធានារក្សាការសម្ងាត់ក្នុងការផ្តល់ព័ត៌មាន។
