នៅព្រឹកថ្ងៃសុក្រ ២រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៦ ខែតុលា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី ដែលធ្វើឡើងនៅវិមានសន្តិភាព រាជធានីភ្នំពេញ។
យោងតាមសេចក្ដីព្រាងច្បាប់ថវិកាឆ្នាំ២០១៩ រាជរដ្ឋាភិបាលអាណត្តិទី៦នេះមានគម្រោងខ្ចីប្រាក់ប្រមាណ ១ ៩០០លានដុល្លារអាមេរិក ដើម្បីបំពេញតម្រូវការថវិកាសម្រាប់អភិវឌ្ឍន៍គម្រោងសាធារណៈនានា នេះជាទំហំកំណត់អតិបរមា សម្រាប់រដ្ឋាភិបាលអាចខ្ចីពីបរទេស។ កត្តាមួយចំនួនដែលរាជរដ្ឋាភិបាលសម្តេច ហ៊ុន សែន ហ៊ានខ្ចីលុយទំហំសាច់ប្រាក់ខាងលើ មាន៖ តម្រូវការអភិវឌ្ឍកើនឡើង ខ្ចីសម្រាប់គម្រោងក្នុងវិស័យអាទិភាព ប្រាក់កម្ចីទាំងនោះមានកម្រិតសម្បទានខ្ពស់ និងស្ថានភាពបំណុលរបស់កម្ពុជាបច្ចុប្បន្ន និងរយៈពេលមធ្យមនៅតែមានចីរភាព និងហានិភ័យកម្រិតទាប។
សូមបញ្ជាក់ថាគិតត្រឹមខែកញ្ញា ឆ្នាំ២០១៨ កម្ពុជាជំពាក់បរទេស ៦,៨ ពាន់លានដុល្លារអាមេរិក។ ក្នុងនោះចិនជាម្ចាស់បំណុលធំជាងគេ ដែលកាន់ចំណែកដល់ទៅ ៤៨ភាគរយនៃបំណុលសរុប បន្ទាប់ពីនោះគឺបំណុលពហុភាគីដែលមានចំណែក ២៩ភាគរយ។
គួរបញ្ជាក់ ឆ្នាំ២០១៩ខាងមុខនេះ រដ្ឋាភិបាលគ្រោងចំណាយថវិការដ្ឋប្រមាណ ៦,៧ពាន់លានដុល្លារ និងគ្រោងរកចំណូលថវិកាក្នុងប្រទេសចំនួន ៥,២ពាន់លានដុល្លារ បើសិនណារដ្ឋសភាអនុម័តលើសេចក្ដីព្រាងច្បាប់ថវិកានោះ។
សម្រាប់របៀបវារៈនៃកិច្ចប្រជុំនាសប្តាហ៍នេះរួមមាន៖ ១) សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ២) សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៧ និង៣) បញ្ហាផ្សេង ៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំសច្ចាប័នពីស្ថាប័ននីតិប្បញ្ញត្តិលើ៖ កិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល រវាងកម្ពុជា-វៀតណាម និងកម្ពុជា-ឥណ្ឌូនេស៊ី។ និងសន្ធិសញ្ញារវាងព្រះរាជាណាចក្រកម្ពុជា និងសហព័ន្ធរុស្ស៊ី ស្តីពីបត្យាប័ន។
