Tuesday, October 30, 2018

ច្រករបៀងចំនួន២ ក្នុងទឹកដីខេត្តមណ្ឌលគិរី បើកភ្លើងខៀវឲ្យក្រុមឈ្មួញដឹកឈើឆ្លងដែន ទៅវៀតណាម

អាម៉ាប៉ាប៉ាញ៉ូស

មណ្ឌលគិរីៈ ច្រករបៀងចំនួន២ នៅក្នុងទឹកដីខេត្តមណ្ឌលគិរី ត្រូវបានគេរាយការណ៍ថា កាលពីយប់ថ្ងៃទី២៩ ឈានចូលទី៣០ ខែតុលា ២០១៨នេះ បានបើកភ្លើងខៀវឲ្យ​ក្រុមឈ្មួញដឹកជញ្ជូនឈើយ៉ាងកក្រើក ឆ្លងដែនទៅប្រទេសវៀតណាម បានយ៉ាង​រលូន។

ប្រភពច្បាស់ការណ៍មួយ បានបង្ហើបឲ្យដឹងថា នៅយប់ថ្ងៃទី២៩ មាន​រថយន្តម៉ាក ឡង់គ្រីស័រកែច្នៃ ជាច្រើនគ្រឿង បាន​សម្រុកដឹកជញ្ជូនឈើឆ្លងដែនទៅប្រទេសវៀតណាម តាមច្រក (ដាក់ដាំ) និងច្រករបៀង (ណាំលៀរ) ហៅប៉ុស្តិ៍០៧ បានយ៉ាងរលូន ក្រោមការឃុបឃិត និងបើកភ្លើងខៀវពីសំណាក់សមត្ថកិច្ចជំនាញពាក់ព័ន្ធ និងមន្ត្រីប្រចាំការនៅច្រកទាំងពីរនេះ។

ប្រភពខាងលើ បន្តឲ្យដឹងថា សកម្មភាពដឹកជញ្ជូនឈើឆ្លងដែនទៅប្រទេសវៀតណាមនេះ​ បានចាប់ផ្តើមដំណើរការប្រមាណមួយសប្តាហ៍ទៅហើយ ប៉ុន្តែស្ថិតនៅក្នុងសភាពស្ងៀមស្ងាត់ ទើបតែយប់មិញនេះ ដោយសារក្បួនរថយន្តដឹកឈើច្រើនគ្រឿង គេបានចែកគ្នា មួយចំនួនឆ្លងទៅតាមប៉ុស្តិ៍ដាក់ដាំ និងមួយចំនួនទៀត ឆ្លងចូលទៅតាមប៉ុស្តិ៍០៧។

ជាមួយនឹងសកម្មភាពចរាចរឈើឆ្លងដែនទៅប្រទេសវៀតណាមនេះដែរ​ គេសង្កេតឃើញមន្ត្រីជំនាញរដ្ឋបាលព្រៃឈើ និងមន្ត្រីប៉ុស្តិ៍តាមច្រកទាំងពីរ ហាក់ដូចជាសម្ងំឈឹងមិនហ៊ានជាមួយក្រុមឈ្មួញធំទាំងនេះឡើយ។

ជុំវិញករណីដឹកឈើជញ្ជូនឆ្លងដែនខុសច្បាប់ តាមច្រកទាំងពីរនេះ អ​ង្គភាពសារព័ត៌មាន Cam Post នៅថ្ងៃទី៣០ ខែតុលា ២០១៨នេះ មិនអាច​ទំនាក់ទំនងសុំការបញ្ជាក់ពីលោក ផូ សំអន ប្រធានច្រកណាំលៀរបានទេ ព្រោះ​គ្មានលេខទំនាក់ទំនង។ ចំណែក​លោក សំ រិទ្ធណយ មេប៉ុស្តិ៍ច្រករបៀងប៉ុស្តិ៍០៧ ក៏អង្គភាពយើ​ង​មិនអាចទំនាក់ទំនងសូមការបញ្ជាក់ដូចគ្នា។

ជុំវិញករណីខាងលើនេះដែរ ប្រជាពលរដ្ឋក៏ដូចជា​មជ្ឈដ្ឋានមួយចំនួន បានស្នើដល់លោក​ ស្វាយ សំអ៊ាង អភិបាលខេត្តមណ្ឌលគីរី មេត្តា​ពិនិត្យមើលចំពោះមន្ត្រី ដែលមានការពាក់ព័ន្ធ ហើយផ្គើននឹងបទបញ្ជារបស់ប្រមុខរាជរដ្ឋាភិបាលផង ដែលហ៊ានអនុញ្ញាតឲ្យ​មានកាចរាចរឈើឆ្លងដែនទៅប្រទេសវៀតណាម៕

@Amapapa.News

Feature Ads