ភ្នំពេញៈ បុរសជនជាតិចិនម្នាក់ ផឹកស៊ីស្រវឹង ដើរស្រែកឡូឡា ត្រូវបានកម្លាំងនគរបាលប៉ុស្តិ៍រដ្ឋបាលព្រែកលៀប នៃអធិការដ្ឋាននគរបាលខណ្ឌជ្រោយចង្វារ ឃាត់ខ្លួនរួចប្រគល់ឲ្យការិយាល័យស៊ើបអង្កេត និងអនុវត្តនីតិវិធី នៃផែនការងារអន្តោប្រវេសន៍ ស្នងការដ្ឋាននគរបាលរាជធានីភ្នំពេញ កាលពីវេលាម៉ោង១៖៤០នាទីរសៀលថ្ងៃអង្គារ ១៤កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៣ ខែតុលា ឆ្នាំ២០១៨នេះ។
ជនជាតិចិនរូបនោះ ឈ្មោះ CHENG KUN ភេទប្រុស អាយុ៣៤ឆ្នាំ ត្រូវបាននគរបាលប៉ុស្តិ៍រដ្ឋបាលព្រែកលៀប បន្ទាប់ពីរូបគេផឹកស្រាស្រវឹង ស្រែកឡូឡានៅតាមទីសាធារណៈ និងគ្មានលិខិតឆ្លងដែនជាប់នឹងខ្លួន។
បន្ទាប់មកកម្លាំងការិយាល័យបានធ្វើការសាកសួរ ឃើញថា ជននេះចូលមកប្រទេសកម្ពុជាលើកចុងក្រោយនៅថ្ងៃ១១ ខែមេសា ឆ្នាំ២០១៨ តាមច្រកអន្តរជាតិព្រលានយន្តហោះភ្នំពេញ រយៈកាលស្នាក់នៅប្រទេសកម្ពុជាគ្មានការងារច្បាស់លាស់។ បច្ចុប្បន្នត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់៕
