កំពង់ឆ្នាំងៈ ស្ត្រីដែលជាប្រពន្ធបានសម្រេចចិត្តដាក់ពាក្យបណ្តឹង ទៅលោកមេឃុំប្តឹងលោកប្តីហេងស៊យថា បានបោកយកចិញ្ចៀនមាស និងម៉ូតូ១គ្រឿងទៅបាត់សូន្យឈឹងមិនឃើញត្រឡប់មកផ្ទះវិញសោះ ។
តាមពាក្យបណ្តឹង ដែលដាក់ចូលទៅលោកមេ ឃុំពន្លៃ ស្រុកបរិបូរណ៍ បានបញ្ជាក់ឲ្យដឹងថា គាត់មានឈ្មោះ យស់ ណិប អាយុ៤០ឆ្នាំ រស់នៅភូមិជើងខ្នា ឃុំពន្លៃ ស្រុកបរិបូរណ៍ ខេត្តកំពង់ឆ្នាំងបានប្តឹងបុរសម្នាក់ឈ្មោះរិទ្ធ មាន អាយុ៤៣ឆ្នាំ មានស្រុកកំណើត ខេត្តកណ្តាល។
ស្ត្រីអភ័ព្វស្នេហ៍រូបនេះបានរៀបរាប់ថា ពីមុនគាត់ជាស្ត្រីមេម៉ាយហើយ ក៏បានស្គាល់បុរសឈ្មោះ រិទ្ធ នៅពេលគេមកធ្វើសំណង់នៅក្នុងភូមិរបស់គាត់ ។ ដំបូងឡើយបុរសរូបនេះបានប្រើល្បិចមកធ្វើជាស្រឡាញ់រូបនាងហើយបានឲ្យចាស់ទុំចូលនិយាយស្តីដណ្តឹងរូបគា ត់យកធ្វើជាប្រពន្ធ។ ប៉ុន្តែមិនបានរៀបការនោះទេ គ្រាន់តែធ្វើពិធីសែនព្រេនតិចតួច តាមបែបប្រពៃណីតែប៉ុណ្ណោះ ។
បន្ទាប់ពីរស់នៅជាមួយគ្នាអស់រយៈពេលបីខែរួចមក រូបគាត់ (ស្ត្រីយស់ណិប) បានទុកចិត្តគ្នាជាប្តីប្រពន្ធ។ ដោយសារតែឃើញប្រពន្ធកាន់តែទុកចិត្តហើយនោះ បុរសជាប្តី (រិទ្ធ) ចាប់ផ្តើមប្រើឧបាយកលបោកប្រាស់តែម្តង។
ស្ត្រីរូបនេះបានបញ្ជាក់ថា នៅមុនថ្ងៃភ្ជុំបិណ្ឌ គឺថ្ងៃទី៦ ខែតុលា ឆ្នាំ ២០១៨ បុរសឈ្មោះ រិទ្ធ នោះបានប្រើល្បិចសុំគាត់ទៅលេងបងប្អូននៅខេត្តពោធិសាត់រយៈពេល១ថ្ងៃ។ គាត់ក៏យល់ព្រមឲ្យទៅដោយនឹកឃើញថា បុរសឈ្មោះរិទ្ធ គឺជាប្តីប្រពន្ធនឹងគ្នាទៅហើយ។
នៅពេលចេញដំណើរទៅ បុរសរូបនេះបានយកចិញ្ជៀន១វង់ ទម្ងន់៣ជី និង ម៉ូតូ១គ្រឿងម៉ាកហុងដាសេ១២៥ ស៊េរីឆ្នាំ២០១៥ ដែលជារបស់គាត់ បានខំសន្សំលុយទិញយកទៅជាមួយផងដែរ ។
ចាប់តាំងពីថ្ងៃនោះ រហូតមក បុរសឈ្មោះ រិទ្ធ នោះមិនឃើញត្រឡប់មកផ្ទះវិញទេ គឺបាត់ឈឹងតែម្តង សូម្បីតែលេខទូរស័ព្ទទាំងពីរខ្សែ ដែលធ្លាប់ប្រើក៏តេមិនចូលដែរ ។
ដោយសារតែមិនឃើញឈ្មោះ រិទ្ធ ជាប្តីត្រឡប់មកផ្ទះវិញដូច្នេះ ទើបគាត់សន្និដ្ឋានបានថា ពិតជាចាញ់ឧបាយកលរបស់បុរសម្នាក់នេះ ហើយក៏បានសម្រចចិត្តដាក់ពាក្យបណ្តឹងតែម្តង៕