កាលពីព្រឹកថ្ងៃពុធ ១៥កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែតុលា ឆ្នាំ២០១៨ នៅទីស្នាក់ការអង្គការហាឡូត្រាស់ (HOLO TRUST) ក្នុងខេត្តសៀមរាប ឯកឧត្តមទេសរដ្ឋមន្ត្រី លី ធុជ អនុប្រធានអាជ្ញាធរមីន និងលោកជំទាវ Tina Redshaw ឯកអគ្គរាជទូតអង់គ្លេសប្រចាំនៅកម្ពុជា បានអញ្ជើញជាអធិបតីក្នុងពិធីប្រកាសគម្រោង DFID គាំទ្រវិស័យសកម្មភាពមីននៅកម្ពុជា ។ នេះជាការបញ្ជាក់របស់អាជ្ញាធរមីនកម្ពុជា។
រដ្ឋាភិបាលអង់គ្លេសបានផ្តល់ថវិកាជាង៩លានដុលា្លរដល់អាជ្ញាធរមីនកម្ពុជា សម្រាប់អនុវត្តគម្រោងសម្អាតមីននៅកម្ពុជារយៈពេល២ឆ្នាំចាប់ពីឆ្នាំ២០១៨ ដល់ឆ្នាំ២០២០។
ឯកឧត្តមទេសរដ្ឋមន្រ្តី លី ធុជ បានបញ្ជាក់ថាគឺជាដំណើរការសំខាន់ក្នុងការបោសសម្អាតមីន សម្រាប់ជួយសង្គ្រោះអាយុជីវិតប្រជាពលរដ្ឋ និងការអភិវឌ្ឍន៍កម្ពុជា។
ឯកឧត្តមទេសរដ្ឋមន្រ្តី បានស្នើឱ្យប្រទេសម្ចាស់ជំនួយ ដៃគូអភិវឌ្ឍន៍ បន្តការផ្តល់ជំនួយ ដើម្បីកម្ពុជាអាចសម្រេចបំណងឆ្ពោះទៅរកកម្ពុជាមួយដែលគ្មានមីននៅឆ្នាំ២០២៥។ មួយវិញទៀត ឯកឧត្តមទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនអង់គ្លេស ចំពោះជំនួយដ៏ថ្លៃថ្លានៅក្នុងវិស័យសកម្មភាពមីន ដែលបានដើរតួនាទីយ៉ាងសំខាន់សម្រាប់ការបោសសម្អាតមីន ការជួយសង្គ្រោះអាយុជីវិតប្រជាពលរដ្ឋ និងការអភិវឌ្ឍន៍នៅកម្ពុជា។
នៅរសៀលថ្ងៃដដែល លោកជំទាវ Tina Redshaw និងឯកឧត្តមទេសរដ្ឋមន្រ្តី លី ធុជ បានជួបជាមួយប្រតិបត្តិករ HALO Trust, MAG និង NPA, បានទស្សនាការធ្វើបទបង្ហាញអំពីការបោសសម្អាតមីននៅស្រុកអូស្មាច់ ខេត្តឧត្តរមានជ័យ និងបានជួបជាមួយគ្រួសារអ្នកទទួលផល ដែលពេលនេះអាចប្រើប្រាស់ដីរបស់ពួកគាត់ដោយសុវត្ថិភាព បន្ទាប់ពីការបោសសម្អាតរួច។