មួយរយៈចុងក្រោយនេះ តម្លៃប្រេងឥន្ទនៈលក់រាយនៅកម្ពុជា បានកើនថ្លៃជាបន្តបន្ទាប់ ជាក់ស្តែងនៅថ្ងៃនេះ នៅស្ថានីយ៍ប្រេងឥន្ធនៈខ្លះ ប្រេងសាំងស៊ុបពែ កើនដល់៤ ៦០០/លីត្រ។ ទាក់ទងនឹងការកើនតម្លៃប្រេងឥន្ធនៈ នេះដែរ ក្រសួងពាណិជ្ជកម្មបានបកស្រាយថា៖ ការកើនថ្លៃនេះ ដោយសារតែកម្ពុជាបានទទួលរងឥទ្ធិពលពីការប្រែប្រួលតម្លៃប្រេងឥន្ទនៈលើទីផ្សារអន្តរជាតិ ដែលមានការកើនឡើងគួរឱ្យកត់សម្គាល់ ទៅតាមបរិបទនយោបាយពិភពលោក។ នេះយោងតាមសេចក្តីជូនដំណឹងស្តីពីការប្រែប្រួលតម្លៃប្រេងឥន្ធនៈនៅក្នុងប្រទេសកម្ពុជា របស់ក្រសួងពាណិជ្ជកម្ម ចុះថ្ងៃទី០៣ ខែតុលា ឆ្នាំ២០១៨។
សេចក្តីជូនដំណឹងដដែល បានបកស្រាយថា ចាប់ពីពាក់កណ្តាលខែកញ្ញា ឆ្នាំ២០១៨ មក ប្រេងសាំង មួយធុង (បារ៉ែល=ចំណុះ១៥៩លីត្រ) ដែលកម្ពុជានាំចូលបានកើនថ្លៃពី៨៦.៩៨ ដល់៨៩.៥២ដុល្លារអាមេរិក និងប្រេងម៉ាស៊ូត បានឡើងថ្លៃពី៩២.១៧ ដល់៩៦.៦៨ដុល្លារអាមេរិក។ នេះជាតម្លៃមិនទាន់បានបូកបញ្ចូលពន្ធនៅឡើយ។
ក្រសួងពាណិជ្ជកម្មអះអាងថា តម្លៃប្រេងទាំងនេះ ត្រូវបានបញ្ចុះ ១៦០រៀល (៤សេន) ក្នុងមួយលីត្រ នៅពេលលក់រាយនៅកម្ពុជា ដើម្បីសម្រួលដល់ការប្រើប្រាស់ប្រចាំថ្ងៃរបស់ប្រជាពលរដ្ឋ។
ក្រសួងពាណិជ្ជកម្ម ដែលមានឯកឧត្តម ប៉ាន់ សូស័ក្ត ជារដ្ឋមន្រ្តីបានបញ្ជាក់យ៉ាងច្បាស់ថា ក្រសួងពាណិជ្ជកម្មមិនមែនជាអ្នកកំណត់តម្លៃលក់រាយប្រេងឥន្ទនៈនៅកម្ពុជាទេ គ្រាន់តែមានភារកិច្ចស្រង់តម្លៃឡើងចុះ នៃប្រេងឥន្ទនៈទៅតាមទីផ្សារអន្តរជាតិ យកមកគណនាតាមប្រកាសអន្តរក្រសួង ស្តីពីការកំណត់រូបមន្តសម្រាប់កែសម្រួលថ្លៃប្រេងលក់រាយនៅកម្ពុជា ដែលបានចុះកាលពីថ្ងៃទី២២ ខែមិថុនា ឆ្នាំ២០១៨ ប៉ុណ្ណោះ។ ក្រសួងពាណិជ្ជកម្មក៏បានអំនាវពាវឱ្យសាធារណជនទាំងអស់ជ្រាបជាព័ត៌មាន។
តាមរយៈហ្វេសប៊ុកក្រសួងបានសរសេរថា៖ សេចក្តីជូនដំណឹងស្តីពីមូលហេតុនៃការប្រែប្រួលតម្លៃប្រេងឥន្ធនៈលក់រាយ (ផលិតផលប្រេងសាំង និងប្រេងម៉ាស៊ូត) នៅលើទីផ្សារក្នុងប្រទេសកម្ពុជា។ សូមជម្រាបថា តម្លៃប្រេងសាំងមិនទាន់គិតពន្ធ គឺថោកជាងប្រេងម៉ាស៊ូត។ ក្នុងការគណនាតម្លៃ គឺពន្ធលើប្រេងសាំង ត្រូវបានគិតខ្ពស់ជាងប្រេងម៉ាស៊ូត ទើបធ្វើឱ្យប្រេងសាំងលក់រាយថ្លៃជាងប្រេងម៉ាស៊ូត។