កំពង់ស្ពឺៈ បន្ទាប់ពីផ្ទុះរឿងអាស្រូវលោកជូ សារុន មេបញ្ជាការអាវុធហត្ថខេត្តស៊ីដាច់លុយ និងអង្ករ របស់មន្ត្រីអាវុធហត្ថ ខេត្តកំពង់ស្ពឺ និងក្រុមអធិការកិច្ច កងរាជអាវុធហត្ថ លើផ្ទៃប្រទេស ចុះធ្វើអធិការកិច្ច គឺលោកឧត្តមសេនីយ៍ត្រី ជូ សារុន មេបញ្ជាការ កងរាជអាវុធហត្ថ ខេត្តកំពង់ស្ពឺ បានបើកថវិកាឧបត្ថម្ភ អន្តរាគមន៍បោះឆ្នោតជ្រើសតាំង តំណាងរាស្ត្រ នីតិកាលទី៦ ឆ្នាំ២០១៨ ដល់មន្ត្រីអាវុធហត្ថ ចំនួន១២០នាក់វិញហើយ បើកុំតែបែករឿងដល់អ្នកកាសែតមិនបានលុយវិញទេ។ នេះបើតាមមន្ត្រីជាន់ខ្ពស់ កងរាជអាវុធហត្ថ លើផ្ទៃប្រទេស បាននិយាយ នៅព្រឹកថ្ងៃទី៤ ខែតុលា ឆ្នាំ២០១៨ ដែលកំពុងតែចុះអង្កេតនៅឡើយនោះ។
លោកឧត្តមសេនីយ៍ត្រី ជូ សារុន បានរងការចោទប្រកាន់ ពីមន្ត្រីនៅក្រោមឱវាទ ថាពាក់ព័ន្ធការស៊ីដាច់អង្ករឧបត្ថម្ភ និងស៊ីដាច់លុយការពារ ការបោះឆ្នោតជ្រើសសមាជិកព្រឹទ្ធសភា និងការបោះឆ្នោតជ្រើសតាំងតំណាងរាស្ត្រ នីតិកាលទី៦រាប់តោន និងរាប់លានរៀល រួមទាំងភាពមិនប្រក្រតី មួយចំនួនថែមទៀតផង។
ដោយសារតែផ្ទុះរឿងអាស្រូវនេះ តាមបណ្តាញប្រពន្ធ័ផ្សព្វផ្សាយនានា បណ្តាញសង្គម កាសែតក្នុងស្រុករួចមកនោះលោក នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងមេបញ្ជាការ កងរាជអាវុធហត្ថ លើផ្ទៃប្រទេស បានបញ្ជាឲ្យលោកឧត្តមសេនីយ៍ត្រី ស៊ឹម ហុង ដឹកនាំគណៈកម្មការចំពោះកិច្ច ចុះធ្វើអធិការកិច្ច ចំពោះករណីនេះ កាលពីថ្ងៃទី០២ និងថ្ងៃទី០៣ ខែតុលា ឆ្នាំ២០១៨កន្លងមកនោះ។
តាមប្រភពពីមន្ត្រីជាន់ខ្ពស់ដដែល បានបញ្ជាក់ថា អាវុធហត្ថខេត្តកំពង់ស្ពឺ បានបើកថវិកាឧបត្ថម្ភអន្តរាគមន៍ សម្រាប់ការការពារ ការបោះឆ្នោតជ្រើសតាំង តំណាងរាស្ត្រ នីតិកាលទី៦ ឆ្នាំ២០១៨ ដល់មន្ត្រីអាវុធហត្ថចំនួន១២០នាក់ ដោយក្នុងម្នាក់បាន ១០៥.០០០រៀល និងថវិកាឧបត្ថម្ភ សម្រាប់ការការពារ ការបោះឆ្នោតជ្រើសតាំង សមាជិកព្រឹទ្ធសភា ក្នុងម្នាក់ ៧០.០០០ រៀល សរុបទាំងអស់ ១៧៥.០០០ រៀល ហើយការបើកថវិកាឧបត្ថម្ភនេះ គឺចាប់ពីថ្ងៃទី៤ ខែតុលា រហូតដល់ថ្ងៃទី ៨ ខែតុលា ឆ្នាំ២០១៨។
ចំណែកមន្ត្រីអាវុធហត្ថខេត្តកំពង់ស្ពឺ បានថ្លែងអំណរគុណ យ៉ាងជ្រាលជ្រៅ ដល់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងមេបញ្ជាការ កងរាជអាវុធហត្ថ លើផ្ទៃប្រទេស ដែលបានជួយអន្តរាគមន៍ ក្នុងរឿងនេះ រហូតពួកគាត់ទទួលបានថវិកា ឧបត្ថម្ភអន្តរាគមន៍ ការការពារការបោះឆ្នោតជ្រើសតាំង តំណាងរាស្ត្រ នីតិកាលទី៦ ឆ្នាំ២០១៨។
រីឯគណៈកម្មការ ចំពោះកិច្ច ដែលចុះធ្វើអធិការកិច្ច នៅទីបញ្ជាការដ្ឋាន កងរាជអាវុធហត្ថ ខេត្តកំពង់ស្ពឺ ដែលដឹកនាំដោយ លោកឧត្តមសេសនីយ៍ត្រី ស៊ឹម ហុង គឺនៅមិនទាន់បង្ហាញ លទ្ធផលនៅឡើយទេ។
ប្រភពច្បាស់ការណ៍ បានប្រាប់បន្ត ឲ្យដឹងទៀតថា លោកឧត្តមសេនីយ៍ត្រី ជូ សារុន បានស៊ីដាច់អង្ករឧបត្ថម្ភរបស់ លោក ហ៊ុន ម៉ានី តំណាងរាស្ត្រ មណ្ឌលខេត្តកំពង់ស្ពឺ និងជាប្រធានសហភាពសហព័ន្ធយុវជនកម្ពុជា ដែលបានផ្តល់ជូនអាវុធហត្ថរាប់លានរៀល និងច្រើនតោនផង។ ការស៊ីដាច់លុយការពារ ការបោះឆ្នោតជ្រើសតាំង សមាជិកព្រឹទ្ធសភា និងបោះឆ្នោតជ្រើសតាំង តំណាងរាស្ត្រ នីតិកាលទី៦។
ប្រភពដដែល បានបន្តថា លោកឧត្តមសេនីយ៍ត្រី ជូ សារុន បានឲ្យមនុស្សជំនិតរបស់ខ្លួន ដើរប្រមូលគាបសង្កត់អ្នករកស៊ី ដោយក្នុងនោះឲ្យ លោកវរសេនីយ៍ទោ លឹម ឧសភាជិះរថយន្តដើរ ប្រមូលលុយពីក្រុមឈ្មួញរកស៊ីបទល្មើសព្រៃ ឈើ និងទំនិញគេចពន្ធនានា នៅលើផ្លូវជាតិលេខ៤ថែមទៀតផង។ ចំណែកលោកវរសេនីយ៍ទោ គង់ វាសនា ហៅ មហាមេឃបានអង្គុយចាំ ប្រមូលលុយផ្លូវជាតិលេខ៥ ដោយដេញចាប់ឡាន នៅស្នាក់ការអាវុធហត្ថ ៥៥១ នៅស្រុកឧដុង្គ។
ទាក់ទងករណីខាងលើនេះ លោកឧត្តមសេនីយ៍ត្រី ជូ សារុន មេបញ្ជាការ កងរាជអាវុធហត្ថ ខេត្តកំពង់ស្ពឺ បានបដិសេធថា លោកមិនបានប្រព្រឹត្ត ដូចការចោទប្រកាន់នោះទេ ៕
