ក្រចេះ ៖ លំនៅឋានប្រជាពលរដ្ឋមួយខ្នងត្រូវអគ្គិភ័យឆាបឆេះបណ្តាលឲ្យខូចខាតគិតជាទឹកប្រាក់ជិត៥ម៉ឺនដុល្លារអាមេរិក ។
ហេតុការណ៍អគ្គិភ័យបានកើតឡើងកាលពីវេលាម៉ោង១៣និង៣០នាទី ថ្ងៃទី២៣ ខែតុលា ឆ្នាំ២០១៨ ស្ថិតនៅភូមិហាន់ជ័យទី១ ឃុំហាន់ជ័យ ស្រុកឆ្លូង ខេត្តក្រចេះ ខណៈដែលមូលហេតុ សមត្ថកិច្ចនៅមិនទាន់ដឹងនៅឡើយទេ ។
ប្រភពរាយការណ៍ថា ម្ចាស់ផ្ទះរងគ្រោះ ឈ្មោះ ពៅ ថាត ភេទស្រី អាយុ៦៩ឆ្នាំ ហើយអគ្គិភ័យនេះបណ្តាលឲ្យខូតខាត ផ្ទះ១ខ្នងទំហំ៦.៥ម៉ែត្រគុណ១៦ម៉ែត្រ សង់អំពីឈើប្រក់ក្បឿង និងឆេះសម្ភារប្រើប្រាស់ក្នុងផ្ទះអស់ទាំងស្រុងតែម្តង។
ប្រភពថា ករណីនេះ ការខូចខាតសរុបគិតជាទឹកប្រាក់ចំនួន ៤៨០០០ដុល្លារ(បួនម៉ឺនប្រាំបីពាន់ដុល្លារអាមេរិក) ។
អាជ្ញាធរបានចេញប្រតិ្តបត្តការពន្លត់ភ្លើងផងដែរ ដោយក្នុងនោះ កម្លាំងអធិការដ្ឋាននគរបាលស្រុកឆ្លូងបានប្រើប្រាស់រថយន្តពន្លត់អគ្គិភ័យចំនួន០១គ្រឿងទៅអន្តរាគមន៍ជួយសង្គ្រោះ ហើយពន្លត់អគ្គិភ័យមិនឲ្យឆេះរាលដាលបន្តទៅលំនៅឋានផ្សេងទៀតបានឡើយ៕
