ភ្នំពេញៈ ក្មេងទំនើង៤នាក់ សុទ្ធតែជើងខ្លាំងដូចគ្នា គ្រាន់តែងាកមើលមុខផងមិនបានទេ ឌឺដងចង់ចាញ់ ចង់ឈ្នះ រហូតឈានដល់ជិះម៉ូតូដេញវាយគ្នា យ៉ាងអនាធិបតេយ្យ ក៏ជ្រុលទៅបុកគ្នាបណ្ដាលឲ្យដួលទាំងសងខាង ហើយនៅតែវាយគ្នាទៀត បណ្ដាលឲ្យយុវជនម្នាក់បែកក្បាល តែត្រូវបានសមត្ថកិច្ចជួយអន្តរាគមន៍ឃាត់ខ្លួនបានទាំង៤នាក់ រួចបញ្ជូនទៅសាកសួរនៅប៉ុស្តិ៍ភ្លាមៗតែម្ដង។
ហេតុការណ៍នេះ បង្កការភ្ញាក់ផ្អើលឡើងកាលពីវេលាម៉ោង៧:៤០នាទីយប់ ថ្ងៃពុធ ទី១៧ ខែតុលា ឆ្នាំ២០១៨ នៅត្រង់ចំណុចផ្លូវ២៧១ (មុខពេទ្យរុស្ស៊ី) ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
សមត្ថកិច្ចបញ្ជាក់ប្រាប់ថា ជនសង្ស័យទាំង៤នាក់មានឈ្មោះដូចជា ៖ ភាគី(ក) ជិះម៉ូតូ Suzuki Nex ពណ៌ខ្មៅ ពាក់ស្លាកលេខ ភ្នំពេញ 1GP-4588 ទី១.ឈ្មោះ ម៉េង ពៅ អាយុ១៩ឆ្នាំ មានទីលំនៅភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ, ទី២.ឈ្មោះ ណេ អាយុ១៦ឆ្នាំ មានទីលំនៅក្នុងភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ និងភាគី(ខ) ជិះម៉ូតូ Dream 2018 ពណ៌ខ្មៅ ពាក់ស្លាកលេខភ្នំពេញ 1HB-8481 ទី១.ឈ្មោះ ពៅ សិលា អាយុ១៧ឆ្នាំ មានទីលំនៅម្ដុំផ្សារឈូកមាស សង្កាត់ភ្នំពេញថ្មី ខណ្ឌសែនសុខ និង ទី២.ឈ្មោះ វី វឌ្ឍនា អាយុ១៥ឆ្នាំ មានទីលំនៅម្ដុំបឹងត្របែក ខណ្ឌចំការមន រាជធានីភ្នំពេញ ។
សាក្សីបានរៀបរាប់ប្រាប់ភ្នាក់ងារ ខេមប៉ុស្តិ៍ ថា នៅមុនពេលកើតហេតុ គេឃើញក្រុមក្មេងទំនើង២នាក់ ជិះម៉ូតូមួយគ្រឿង ម៉ាក Suzuki Nex កំពុងធ្វើដំណើរពីលិចទៅកើត ឌុបគ្នាក្នុងល្បឿនយ៉ាងលឿន មកពីក្រោយក្រុមក្មេងទំនើងមួយក្រុមទៀត មានគ្នា២នាក់ដូចគ្នា ជិះម៉ូតូមួយគ្រឿង ម៉ាក Dream 2018 រួចជិះដេញវាគ្នាទៅវិញទៅមក តាមផ្លូវ២៧១ រួចមើលមុខគ្នាលក្ខណៈឌឺដងចង់ចាញ់ចង់ឈ្នះ លុះមកដល់ចំណុចមុខពេទ្យរុស្ស៊ី ស្រាប់តែភាគីក្មេងទំនើង ដែលជិះ Dream បានស្រែកថា ភាគីក្មេងទំនើងជិះម៉ូតូ Nex ជា "ចោរៗ" ហើយក៏បុកគ្នាបណ្ដាលឲ្យដួលម៉ូតូទាំង២គ្រឿងតែម្ដង ហើយក្រុមក្មេងទំនើង ដែលជិះម៉ូតូ Dream បានវាយទៅលើភាគីដែលជិះម៉ូតូ Nex បណ្ដាលឲ្យពកក្បាល ហើយភាគីដែលជិះម៉ូតូ Nex ក៏ស្ទុះទៅរើសមួកសុវត្ថិភាព យកមកវាយទៅលើភាគីដែលជិះម៉ូតូ Dream វិញ បណ្ដាលឲ្យបែកក្បាលម្នាក់ បង្កការភ្ញាក់ផ្អើលដល់អ្នកដំណើរ និងធ្វើឲ្យមានការកកស្ទះចរាចរណ៍ ។
សាក្សីបន្ថែមទៀតថា ភ្លាមៗនោះគេឃើញកម្លាំងសមត្ថកិច្ចស្លៀកពាក់ស៊ីវិល ដែលនៅជិតនោះ ចេញជួយអន្តរាគមន៍ ជួយឃាត់ខ្លួនបណ្ដោះអាសន្ននៅកន្លែងកើតហេតុ ហើយទាក់ទងប្រគល់ឲ្យសមត្ថកិច្ចមូលដ្ឋានប៉ុស្តិ៍នគរបាលស្ទឹងមានជ័យ២ ចុះមកកន្លែងកើតហេតុ ដើម្បីជួយសម្រួលចរាចរណ៍ ដើម្បីកុំឲ្យមានការកកស្ទះ និងឃាត់ខ្លួនក្រុមក្មេងទំនើងទាំង៤នាក់នោះ យកទៅប៉ុស្តិ៍ដើម្បីសាកសួរផងភ្លាមៗ ។
ក្រោយពេលកើតហេតុភាគីទាំងសងខាងយល់ព្រមសម្របសម្រួលគ្នា ដោយភាគីខាងម៉ូតូ Nex ជួយចេញថ្លៃលាងរបួសទៅឲ្យភាគីខាងម៉ូតូ Dream ដែលរងរបួសបែកក្បាល ចំនួន ៣០ដុល្លារ ដើម្បីបញ្ចប់រឿង រួចសមត្ថកិច្ចប៉ុស្តិ៍នគរបាលស្ទឹងមានជ័យទី២ បានកិច្ចសន្យា អប់រំណែនាំ ហៅអាណាព្យាបាលឲ្យមកយក ត្រឡប់ទៅផ្ទះវិញ រៀងៗខ្លួន ៕
