សម្រាប់រយៈពេល៩ខែ ក្នុងឆ្នាំ២០១៨ នេះ ភ្ញៀវទេសចរទៅកម្សាន្តនៅខេត្តព្រះសីហនុ មានចំនួន១ ៦១០ ២៦៩នាក់ មានការកើនឡើង ៦.៥៦ភាគរយ ធៀបនឹង រយៈពេលដូចគ្នា ក្នុងឆ្នាំ២០១៧ ដែលមានចំនួនតែ ១ ៥១១ ០១៩នាក់។ ក្នុងនោះភ្ញៀវជាតិមានចំនួន ១ ១៩៥ ៤៤០នាក់ និងអន្តរជាតិមានចំនួន ៤១៤ ៨២៩នាក់។ យោងតាមការចុះផ្សាយរបស់ទីភ្នាក់ងារសារព័ត៌មានជាតិ AKP។
លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានបញ្ជាក់ថាភ្ញៀវទេសចរបរទេសសំខាន់មាន១០ប្រទេស ដែលក្នុងនោះភ្ញៀវទេសចរជនជាតិចិននាំមុខគេ មានចំនួន ១៣០ ៦៤៤នាក់ (កើន៣៨.៥៤%) តាមពីក្រោយដោយភ្ញៀវទេសចរវៀតណាម ចំនួន២៨.៧៨៧នាក់ (កើន៩.៣៦%)។
ក្រៅពីនេះមានភ្ញៀវទេសចអង់គ្លេស រុស្ស៊ី បារាំង អូស្ត្រាលី អាម៉េរិក ថៃ អាល្លឺម៉ង់ ម៉ាឡេស៊ី ដែលភាគច្រើនបានធ្លាក់ចុះគួរឱ្យកត់សម្គាល់។
បើយោងតាមរបាយការណ៍របស់ក្រសួងទេសចរណ៍ ដែលបានចេញផ្សាយកាលពីដើមខែកញ្ញា បានឱ្យដឹងថា៖ ក្នុង រយៈពេល៧ខែដើមឆ្នាំ២០១៨ មានភ្ញៀវទេសចរជនជាតិចិនចំនួនជាង ១ លាននាក់ មកទស្សនានៅប្រទេសកម្ពុជាដែលកើន ៧២,៦ ភាគរយបើធៀបនឹងរយៈពេលដូចគ្នា កាលពីឆ្នាំ២០១៧។
គួររំលឹកថា ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានព្យាករណ៍ថា៖ ប្រទេសកម្ពុជានឹងទាក់ទាញអ្នកទេសចរចិនយ៉ាងហោចណាស់ ១.៧ លាននាក់នៅក្នុងឆ្នាំ២០១៨ ហើយកើនឡើងដល់ ២.៥ លាននាក់ ក្នុងឆ្នាំ ២០២០ ខាងមុខ។