Tuesday, October 2, 2018

រាជរដ្ឋាភិបាលកម្ពុជា ផ្តល់ជំនួយមនុស្សធម៌២០ម៉ឺនដុល្លារ ស្របពេលកាកបាទក្រហមកម្ពុជាផ្តល់៥ម៉ឺនដុល្លារអាមេរិក ដល់ឥណ្ឌូនេស៊ីដែលជួបគ្រោះរញ្ជួយដី និងរលកយក្សស៊ូណាមិ

រិទ្ធី

រាជរដ្ឋាភិបាលកម្ពុជា​ ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានសម្រេចរួមចំណែក​នូវ​​ជំនួយមនុស្សធម៌ចំនួន ២០០.០០០ ដុល្លារ​អាមេរិក​ (ម្ភៃម៉ឺនដុល្លារអាមេរិក​) ដល់​ជនរងគ្រោះ​​ដោយរញ្ជួយដី និងរលកស៊ូណាមិ នៅទីក្រុងប៉ាលូ កោះស៊ូឡាវេសស៊ី ប្រទេសសាធារណដ្ឋរឥណ្ឌូនេស៊ី ដែល​បំផ្លិចបំផ្លាញ​ប្រទេសរយៈពេល​ប៉ុន្មាន​ថ្ងៃ​មកនេះ។ យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី០១ ខែតុលា ឆ្នាំ២០១៨។

សេចក្តីប្រកាស​ព័ត៌មានដដែលបាន​បញ្ជាក់ថា ទឹកប្រាក់​២០​ម៉ឺន​ដុល្លារ គឺជា​ជំនួយ​មនុស្សធម៌ សម្រាប់​រំលែក​ទុក្ខ​ដល់​ជនរងគ្រោះ ដោយសារ​មហន្តរាយ​ពី​គ្រោះធម្មជាតិ នៃ​សោកនាដកម្ម​នេះ ដែលជា​ការបង្ហាញ​ពី​សាមគ្គីភាព​ជាមួយ      ​រដ្ឋា​ភិ​បាល និង​ប្រជាជន​ឥណ្ឌូណេស៊ី ក្នុង​គ្រា​លំបាក​។ 

​ខណៈដែលកាកបាទក្រហមកម្ពុជា បានចូលរួមរំលែកទុក្ខ និងផ្តល់ថវិកា៥ម៉ឺនដុល្លារអាមេរិក ជូនកាកបាទក្រហមឥណ្ឌូណេស៊ីសម្រាប់ប្រតិបត្តិការជួយអ្នករងគ្រោះដោយរញ្ជួយដី និងរលកយក្សស៊ូណាមី។ យោងតាមលិខិតលេខ២៥១ កក្រក.ទទ ចុះថ្ងៃទី០១ ខែតុលា ឆ្នាំ២០១៨ របស់កាកបាទក្រហមកម្ពុជា។

កាកបាទក្រហមកម្ពុជា បញ្ជាក់ថា៖ ដោយសារគ្រោះធម្មជាតិ និងដើម្បីរួមចំណែកជួយសម្រាលការលំបាកដល់ប្រជាជនឥណ្ឌូនេស៊ី កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យគណៈប្រតិភូ នាំយកសារលិខិតរំលែកទុក្ខ និងថវិកាចំនួន ៥០.០០០ដុល្លារ (ប្រាំម៉ឺនដុល្លារអាមេរិក) ទៅប្រគល់ជូនដល់កាកបាទក្រហមឥណ្ឌូណេស៊ី តាមរយៈ ឯកឧត្តម ស៊ូឌីរម៉ាន់ ហាសែន (Sudirman Haseng) ឯកអគ្គរដ្ឋទូត ឥណ្ឌូណេស៊ីចាំព្រះរាជាណាចក្រកម្ពុជា សម្រាប់ប្រតិបត្តិការជួយប្រជាជនរងគ្រោះដោយរញ្ជួយដី និងរលកយក្សស៊ូណាមី កាលពីថ្ងៃទី ២៩ ខែកញ្ញា ឆ្នាំ២០១៨ កន្លងទៅនេះ។

@Amapapa.News

Feature Ads