សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថាគម្រោងសិក្សាដើម្បីបង្កើតខេត្តថ្មីចំនួនពីរ នឹងមិនមាននោះឡើយ។ ការបញ្ជាក់របស់ សម្តេចអគ្គមហាសេនាបតីតេជោ ហ៊ុន សែន បែបនេះធ្វើឡើងក្នុងពិធីអបអរសាទរទិវាគ្រូបង្រៀន ០៥ តុលា នៅព្រឹកថ្ងៃសុក្រ ១១រោច ខែភទ្របទ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី៥ ខែតុលា ឆ្នាំ២០១៨។
ភ្លាមៗទីស្តីការគណៈរដ្ឋមន្ត្រីផ្ញើលិខិតគោរពជូនសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ករណីស្នើសុំបង្កើតខេត្តថ្មីចំនួន២ ចេញពីខេត្តកណ្តាល ខេត្តមណ្ឌលគិរី និងខេត្តរតនគិរី។ យោងលិខិតលេខ១១០០ សជណ ចុះថ្ងៃទី០៥ ខែតុលា ឆ្នាំ២០១៨។
ក្នុងលិខិតទីស្តីការគណៈរដ្ឋមន្ត្រីនេះ បញ្ជាក់ថា៖ រាជរដ្ឋាភិបាលកម្ពុជាសម្រេចបញ្ឈប់ការសិក្សាស្រាវជ្រាវចាប់ពីពេលនេះតទៅ។
សូមរំលឹកថា កាលពីថ្ងៃទី២៧ ខែសីហាឆ្នាំ២០១៨ សម្តេចក្រឡាហោម ស ខេង បានស្នើសុំគោលការណ៍ដើម្បីបង្កើតខេត្តថ្មីចំនួន២ ដែលខេត្តមួយត្រូវកាត់ចេញពីខេត្ដកណ្ដាល និងខេត្តមួយទៀត ត្រូវកាត់ចេញពីស្រុកកោះញែកនៃខេត្តមណ្ឌលគិរី និងស្រុកលំផាត់នៃខេត្តរតនគិរី ក្រោមហេតុផលដើម្បីលើកកម្ពស់ប្រសិទ្ធភាពនៃការគ្រប់គ្រងរដ្ឋបាល និងថែរក្សាសន្ដិសុខសណ្ដាប់ធ្នាប់សាធារណៈ និងបង្កើនប្រសិទ្ធភាពនៃការគ្រប់គ្រង និងអភិវឌ្ឍន៍។