លោកស្រី Federica Mogherini តំណាងជាន់ខ្ពស់នៃសហភាពអឺរ៉ុប និងលោកស្រី Cecilia Malmström ស្នងការពាណិជ្ជកម្មសហភាពអឺរ៉ិប បានជូនដំណឹងដល់កម្ពុជាថាយើងកំពុងតែអនុវត្តដំណើរការសម្រាប់ការដកហូតនូវការអនុគ្រោះអ្វីៗទាំងអស់លើកលែងតែសព្វាវុធ (Everything But Arms or EBA)។ ដោយគ្មានការកែលម្អច្បាស់លាស់និងជាភស្តុតាងជាក់ស្តែងនៅនឹងមូលដ្ឋាន ដំណើរការនេះនឹងនាំទៅរកការព្យួរនៃការអនុគ្រោះពាណិជ្ជកម្មដែលពួកគេទទួលបាននាពេលបច្ចុប្បន្ន។ ដំណើរការនេះបានប្រព្រឹត្តទៅកាលពីថ្ងៃទី០៥ ខែតុលា ម្សិលមិញនេះ។ យោងតាមហ្វេសប៊ុក របស់លោក មុត ចន្ថា អតីតនាយខុទ្ទកាល័យលោក កឹម សុខា។
មិនមែនតែប្រទេសកម្ពុជាទេ ដែលសហភាពអឺរ៉ុប កំពុងអនុវត្តដំណើរការដកហូតប្រព័ន្ធអនុគ្រោះពន្ធពាណិជ្ជកម្ម ប្រទេសមីយ៉ាន់ម៉ា ដែលជាសមាជិករបស់សមាគមអាស៊ានផងដែរ។
យោងតាមការបកប្រែពីភាសាអង់គ្លេសក្រៅផ្លូវការ៖ តំណាងជាន់ខ្ពស់នៃសហភាពអឺរ៉ុប និយាយថា៖ នៅប្រទេសកម្ពុជា នៅពេលជាមួយគ្នា យើងកំពុងឃើញការអភិវឌ្ឍប្រកបដោយបញ្ហាខ្លាំង ដោយគ្មានការកែលម្អគួរឲ្យទុកចិត្តនៅនឹងកន្លែង។ បេសកកម្មកាលពីពេលថ្មីរបស់សហភាពអឺរ៉ុបមកកាន់ប្រទេសនេះបានបង្ហាញអំពីការរំលោភធ្ងន់ធ្ងរនិងជាប្រព័ន្ធ ឧទាហរណ៍ សេរីភាពខាងការបញ្ចេញមតិ សិទ្ធិការងារ និងសេរីភាពខាងសមាគម។
បញ្ហានេះកើតឡើងនៅពីលើបញ្ហានានាដែលមានជាយូរមកហើយដែលទាក់ទិនទៅនឹងសិទ្ធិរបស់កម្មករ និងការ ដណ្តើមយកដី។ បញ្ហាអភិវឌ្ឍន៍សិទ្ធិមនុស្ស និងសិទ្ធិកម្មករ នៅតែជាបញ្ហាដែលគ្មានសញ្ញាច្បាស់លាស់បង្ហាញឱ្យឃើញអំពីភាពប្រសើរឡើងឡើយ។
ស្នងការពាណិជ្ជកម្មសហភាពអឺរ៉ុប បានបញ្ជាក់ដូច្នេះថា៖ យើងនឹងបន្តឆ្ពោះទៅនៃដំណើរការអនុគ្រោះពន្ធនេះ។
គួររំលឹកថា នៅឆ្នាំ២០១៧ កម្ពុជាបាននាំទំនិញទៅទីផ្សារសហភាពអឺរ៉ុប (EU) ជាង ៥,៧ពាន់លានដុលា្លរអាមរិក ដោយទទួលបានការអនុគ្រោះពន្ធទាំងស្រុង។ បើមិនទទួលបានការអនុគ្រោះពន្ធទេ កម្ពុជាត្រូវបង់ពន្ធជាង៥០០លានដុល្លារចូលទីផ្សារអឺរ៉ុប។
ប្រភព៖ https://ec.europa.eu/…/malmstr…/blog/myanmar-and-cambodia_en