ឯកឧត្តម អុន ឈន ទីប្រឹក្សារបស់សម្តេចក្រឡាហោម ស ខេង ទេសរដ្ឋមន្រ្តី រដ្ឋមន្ត្រីក្រសួងមហាផ្ទៃ បានទទួលមរណភាព កាលពីថ្ងៃទី២៨ ខែកញ្ញា ឆ្នាំ២០១៨ ក្នុងជន្មាយុ៧៤ឆ្នាំ ដោយរោគាពាធ។
សម្តេចក្រឡាហោម ស ខេង នាយករដ្ឋមន្ត្រីស្តីទី ព្រមទាំងថ្នាក់ដឹកនាំមន្ត្រីរាជការស៊ីវិល និងមន្ត្រីនគរបាលជាតិទាំងអស់ នៃក្រសួងមហាផ្ទៃ បានអញ្ជើញគោរពវិញ្ញាណក្ខន្ធ ឯកឧត្ដម អុន ឈន ទីប្រឹក្សាសម្តេចក្រឡាហោម ស ខេង នៅគេហដ្ឋានស្ថិតនៅបុរីប៉េងហូត សង្កាត់និរោធ ខណ្ឌច្បារអំពៅ រាជធានីភ្នំពេញ នាព្រឹក ថ្ងៃចន្ទ ០៧រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែតុលា ឆ្នាំ២០១៨ ។
ចំណែកឯ ឯកឧត្តម តេង សាវង្ស រដ្ឋលេខាធិការនៃក្រសួងមហាផ្ទៃ បានសរសេរក្នុងលិខិតរំលែកទុក្ខថា មរណភាពរបស់ឯកឧត្តម អុន ឈន គឺជាការបាត់បង់មន្ត្រីជាន់ខ្ពស់ម្នាក់របស់ក្រសួងមហាផ្ទៃ ដែលធ្លាប់បំពេញការងារយ៉ាងសកម្ម និងមានស្នាដៃជាច្រើនក្នុងកិច្ចការពារសន្តិសុខ សុវត្ថិភាព និងសណ្តាប់ធ្នាប់សាធារណៈជូនសង្គមជាតិ។
