Tuesday, October 2, 2018

គ្រាន់តែសួរនាំរឿងប្រាក់ខែ លោកប៉ូលិសស័ក្តិ៣ ទាញកែវស្រាវាយក្បាលប្រពន្ធប្រាវ

អាម៉ាប៉ាប៉ាញ៉ូស

កំពង់ឆ្នាំងៈ ភរិយារបស់មន្រ្តីនគរបាលម្នាក់ បានរងរបួសក្បាល បន្ទាប់ពីប្តីរបស់ខ្លួន បានទាញកែវស្រាវាយក្បាល ក្នុងវង់ផឹកស៊ី បន្ទាប់ពីស្ត្រីរងគ្រោះសួរនាំរឿងប្រាក់ខែ ។ ហេតុការណ៍នេះបានកើតឡើងកាលពីវេលាម៉ោង ៨និង១៥នាទីយប់ ថ្ងៃទី១ ខែតុលា ឆ្នាំ២០១៨ ស្ថិតនៅក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។

ស្រ្តីរងរងគ្រោះបានប្រាប់ឲ្យដឹងថា រូបគាត់ឈ្មោះ ស្រស់ សុភី មានប្តី ឈ្មោះ សោម តារា អាយុ៣២ឆ្នាំ ពាក់ស័ក្តិ៣ គាត់បានរស់នៅជាមួយគ្នាជាប្តីប្រពន្ធអស់រយៈពេលជិត២០ឆ្នាំហើយ គាត់មានកូន៥នាក់ ស្រី៣នាក់ ប្រុស២នាក់ ។

ស្រ្តីឈ្មោះ ស្រស់ សុភីប្រាប់ឲ្យដឹងទៀតថា កាលយប់ថ្ងៃទី១ ខែតុលា ប្តីរបស់គាត់បានផឹកស៊ីជុំមិត្តភ័ក្តិ នៅផ្ទះឈ្មោះ ជា នៅពេលដែលកំពុងផឹកស៊ី រូបគាត់ជាប្រពន្ធ បានសួររកប្រាក់ខែ ដែលសន្យាថានឹងឲ្យគាត់ ។ ពេលសួររួច ប្តីរូបនេះ ខឹងសម្បារយ៉ាងខ្លាំង ទប់កំហឹងមិនបាន ក៏ស្ទុះយកកែវស្រាដែលកំពុងផឹក វាយមកលើក្បាលរបស់គាត់បណ្តាលឲ្យរងរបួសតែម្តង ។

ប្រភពបន្តថា ដោយសារតែខឹងខ្លាំងពេក ពេលទៅផ្ទះប្តី ឈ្មោះ សោម តារ៉ានេះ​បានប្រើហិង្សាមកលើរូបគាត់ទៀត គឺបានទាញកាំបិតដេញកាប់ ពួកគាត់ ធ្វើឲ្យគាត់ភ័យយ៉ាងខ្លាំង ។ ក្រោយពេលកើតហេតុ គាត់បានទូរស័ព្ទប្តឹង ទៅសមត្ថកិច្ចនគរបាលប៉ុស្តិ៍ និង កម្លាំងកងរាជអាវុធហត្ថដែរ ប៉ុន្តែសមត្ថកិច្ចមិនបានជួយដោះស្រាយជូនគាត់នោះទេ គ្រាន់តែប្រាប់ថា​ ចាំព្រឹកឡើង ឲ្យដាក់ពាក្យបណ្តឹង ។

ស្រ្តីរងគ្រោះរូបនេះ បានប្រាប់ថា អំពើហិង្សា របស់ប្តីនេះ ច្រើនលើកច្រើនសារមកហើយ វាយធ្វើបាបគាត់មិនដែលលោះថ្ងៃនោះទេ ពេលណាមួយនោះ បានលើកទឹកស៊ុបជះមកលើគាត់ បណ្តាលឲ្យរលាកពេញមុខ និងខ្លួន ដែលមានស្នាមរបួសរហូតដល់សព្វថ្ងៃនេះ ។ រាល់ដង ក៏ធ្លាប់ជូនដំណឹងទៅសមត្ថកិច្ចផងដែរ ប៉ុន្តែសមត្ថកិច្ចនៅតែមិនអើពើរឿងនេះដដែល ។

ពេលនេះ ស្ត្រីរងគ្រោះស្នើឲ្យលោកស្នងការ និង ស្ថាប័នពាក់ព័ន្ធ មេត្តាជួយអន្តរាគមន៍ផង បើពុំដូច្នេះទេ រូបគាត់នឹងប្រឈមបញ្ហាអំពើហិង្សាខ្លាំងជាងនេះទៅទៀត ដោយសារតែប្តីប៉ូលិសស័ក្តិ៣វាយធ្វើបាប ៕

@Amapapa.News

Feature Ads