កោះកុងៈ យ៉ាងហោចណាស់មានមនុស្សចំនួន៤នាក់ បានរងរបួសធ្ងន់ស្រាល បន្ទាប់ពីជួបគ្រោះថ្នាក់ចរាចរណ៍រថយន្តឡិចស៊ីស បើកលឿនចុះចំណោត ជាន់ហ្វ្រាំង ហើយរអិលគ្រួសក្រាលលើផ្លូវ ជ្រុលទៅបុកបង្គោលថ្មសុវត្ថិភាព រួចក៏ធ្លាក់ផ្លូវតែម្ដង។
គ្រោះថ្នាក់ចរាចរណ៍ខាងលើនេះ កើតឡើងកាលពីវេលាម៉ោង២រសៀលថ្ងៃទី២៦ ខែតុលា ឆ្នាំ២០១៨ នៅចំណុចចំណោតតាតៃក្រោម ចន្លោះគីឡូម៉ែត្រលេខ១២៨-១២៩ ស្ថិតនៅភូមិអន្លង់វ៉ាក់ ឃុំតាតៃក្រោម ស្រុកកោះកុង ខេត្តកោះកុង។
រថយន្តបង្កគ្រោះថ្នាក់ចរាចរណ៍ដោយខ្លួនឯងនោះ ម៉ាកឡិចស៊ីស RX300 ពណ៌ផ្សែងបារី ពាក់ស្លាកលេខ ភ្នំពេញ 2I-50676 ធ្វើដំណើរទិសដៅភ្នំពេញទៅទីរួមខេត្តកោះកុង បើកបរក្នុងល្បឿនលឿន លុះមកដល់ចំណុចកើតហេតុ បានចុះចំណោត ជាន់ហ្វ្រាំង ហើយរអិលក្រួសក្រាលលើផ្លូវ ក៏រេចង្កូតទៅបុកនិងបង្គោលថ្មសុវត្ថិភាព បណ្ដាលឲ្យរថយន្តធ្លាក់ផ្លូវតែម្ដង នឹងធ្វើឲ្យមនុស្សជិះក្នុងរថយន្ត៤នាក់ រងរបួសធ្ងន់ស្រាល។
អ្នកបើកបររថយន្តឈ្មោះ យ៉ែម ផន ភេទប្រុស អាយុ៣២ឆ្នាំ មានទីលំនៅភូមិ ត្រពាំងថ្លឹង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ (ពុំមានរបួស) និងរួមដំណើរ០៤នាក់ ១-ឈ្មោះ មុំ សុភាព ភេទប្រុស អាយុ៣៣ឆ្នាំ មានទីលំនៅបច្ចុប្បន្ន ភូមិចាក់ជ្រូក សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ រងរបួសធ្ងន់ (បាក់ដៃ នឹងជាប់ចង្កេះ)។ ២-ឈ្មោះផែន ឌិន ភេទប្រុស អាយុ៣៦ឆ្នាំ មានទីលំនៅបច្ចុប្បន្ន ភូមិត្រពាំងសាលា សង្កាត់ពង់ទឹក ខណ្ឌដង្កោ រាជធានីភ្នំពេញ របួសស្រាល (បែកក្បាល)។ ៣-ឈ្មោះ យ៉ែ វិចិត្រ ភេទប្រុស អាយុ២៥ឆ្នាំ មានទីលំនៅបច្ចុប្បន្នភូមិត្រពាំងថ្លឹង សង្កាត់ ចោមចៅ ខណ្ឌពោធិសែនជ័យ រាជធានីភ្នំពេញ រងរបួសស្រាល។ ៤-ឈ្មោះ សួស វិចិត្រ ភេទប្រុស អាយុ២៥ឆ្នាំ មានទីលំនៅបច្ចុប្បន្នភូមត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ របួសស្រាល (បែកមាត់)។
ក្រោយកើតហេតុកម្លាំងប៉ុស្តិ៍នគរបាលរដ្ឋបាលតាតៃក្រោមសហការជាមួយកម្លាំងជំនាញអធិការដ្ឋាននគរបាលស្រុកោះកុង ចុះអន្តរាគមន៍ និងជួយសង្គ្រោះទាន់ពេលវេលា បានខលហៅរថយន្តសង្គ្រោះរបស់មន្ទីរពេទ្យបង្អែកខេត្តកោះកុង នឹងរថយន្តសារ៉ែនរបស់ស្នងការដ្ឋាននគបាលខេត្តកោះកុង ដឹកអ្នករបួសបញ្ជូនទៅកាន់មន្ទីរពេទ្យខេត្តកោះកុង៕