ចាប៉ីដងវែងច្នៃពីដបទឹកបរិសុទ្ធប្រើប្រាស់រួច គ្រោងនឹងដាក់តាំងបង្ហាញនៅមហោស្រពចាប៉ីដងវែងនៅក្នុងបរិវេណវត្តរាជបូណ៌ ក្នុងខេត្តសៀមរាប ដើម្បីលើកស្ទួយតម្លៃសិល្បៈ និងបរិស្ថានដែលនឹប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី០២ ខែធ្នូ ឆ្នាំ២០១៨ ខាងមុខនេះ។
ចាប៉ីដងវែងនេះត្រូវបានកែច្នៃឡើងដោយលោក រៀម មុនីស៊ីឡុង ហៅវិចិត្រករសំរាម ដោយយកដបទឹកបរិសុទ្ធប្រើប្រាស់រួចចំនួន៦ ០០០ ដបនិងទុយោបឺត ចំនួន១៦ ០០០ ដើម។
លោក រៀម មុនីស៊ីឡុង បានបញ្ជាក់ឱ្យដឹងថាចាប៉ីដងវែងដែលធ្វើពីសំរាមនេះ មានប្រវែង៦ម៉ែត្រ និងបានកែច្នៃដាក់លើរទេះគោដោយមានកង់ធាក់ ដើម្បីលើកស្ទួយដល់សិល្បៈចាប៉ី ដែលប្រឈមនឹងបាត់បង់ ហើយចាប៉ីដងវែងនេះច្នៃឡើងដោយដបទឹកបរិសុទ្ធ ក្នុងគោលបំណងបង្ហាញដល់ពលរដ្ឋខ្មែរ ឱ្យចេះរក្សាទុកសំរាមឱ្យបានត្រឹមត្រូវ ដើម្បីលើកម្ពស់សុខភាពនិងអនាម័យ និងបង្ហាញពីអត្ថប្រយោជន៍នៃសំរាមផងដែរ។
លោកបានបន្តទៀតថា អង្គការសិល្បៈខ្មែរអមតៈ បានបង្កើតជាសារ ផ្សព្វផ្សាយ ដើម្បីអប់រំដល់ប្រជាពលរដ្ឋកាត់បន្ថយការប្រើប្រាស់ថង់ប្លាស់ស្ទីកផងដែរ ព្រោះវាប៉ះពាល់ដល់សុខភាព និងបរិស្ថាន ជាពិសេសសោភ័ណភាព នៃទីក្រុងទេសចរណ៍អង្គរ ក្នុងខេត្តសៀមរាប ដែលទាក់ទាញភ្ញៀវទេសចររាប់លាននាក់មកទស្សនាក្នុងមួយឆ្នាំៗ។
សូមបញ្ជាក់ថា អង្គការសិល្បៈខ្មែរអមតៈ បានជួយបណ្តុះបណ្តាល និងគាំទ្រដល់យុវជនជាច្រើន ឱ្យមានជំនាញសិល្បៈ ជាពិសេសបង្រៀនឱ្យចេះជំនាញឆ្នៃប្រឌិតបង្កើតស្នាដៃសិល្បះនិងសម្បែងសិល្បៈបុរាណខ្មែរ។
កាលពីព្រឹកថ្ងៃទី២២ ខែវិច្ឆិកា កន្លងទៅ លោក រៀម មុនីស៊ីឡុង និងមិត្តភក្តិបានដឹកចាប៉ីដងវែងនេះយកទៅដាក់នៅបរិវេណមហោស្រពក្នុងវត្តរាជបូណ៌ តាមរយៈរទេះគោដោយមានកង់ធាក់។