កំពង់ធំៈ មនុស្សម្នាក់ បានស្លាប់ និងម្នាក់ទៀត រងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ នៅវេលាម៉ោង៧៖៣០នាទីព្រឹកថ្ងៃទី៣០ ខែវិច្ឆិកា ឆ្នាំ២០១៨ នៅចំណុចអូរដៃជ្រៃ តំបន់អូរកំពប់អំបិល ភូមិសង្គ្រោះ ឃុំបឹងល្វា ស្រុកសន្ទុក ខេត្តកំពង់ធំ បង្កឡើងរវាងរថយន្តសាំយុងដឹកឈើ បុកម៉ូតូឌ្រីមសង់ កំពុងឌុបប្រពន្ធ។
សមត្ថកិច្ចប៉ុស្តិ៍បឹងល្វា បានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តម៉ាកសាំយ៉ុង ពណ៌លឿង គ្មានស្លាកលេខ ដឹកឈើពេញរថយន្ត បើកបរពីជើងទៅត្បូង លុះមកដល់មុខស្នាក់ការបរិស្ថានអូរកំពប់អំបិល បានបន្ថែមល្បឿនយ៉ាងលឿន ជ្រុលទៅបុកម៉ូតូជនរងគ្រោះពីក្រោយពេញទំហឹង បណ្តាលឲ្យប្តីជាអ្នកបើកម៉ូតូស្លាប់ភ្លាមៗនៅនឹងកន្លែងកើតហេតុយ៉ាងអណោចអាធ័ម រីឯប្រពន្ធរងរបួសធ្ងន់។
អ្នកបើកបរម៉តូឈ្មោះ សៀន ឈិន ភេទប្រុស អាយុ៦២ឆ្នាំ (ស្លាប់) ប្រពន្ធឈ្មោះ ឃ្លោក ជឹង អាយុ៥៨ឆ្នាំ អ្នកទាំងពីរ រស់នៅភូមិត្បែង ឃុំបឹងល្វា ស្រុកសន្ទុក ខេត្តកំពងធំ។ ចំណែកអ្នកបើកបររថយន្តដឹកឈើ ត្រូវបានគេស្គាល់ឈ្នោះ រី ថន រស់នៅភូមិបឹង ឃុំបឹង ស្រុកបារាយណ៍ ខេត្តកំពង់ធំ ដែលជាអ្នករកស៊ីដឹកជញ្ជូនឈើ ដុះស្លែជាយូរមកហើយ បន្ទាប់បង្កហេតុភ្លាម បានរត់គេចខ្លួន ដោយសុវត្ថិភាព។
ក្រោយកើតហេតុសមត្ថកិច្ចចុះទៅដល់បញ្ជូនរងគ្រោះទៅកាន់មន្ទីរពេទ្យ សាកសពប្រគល់ឲ្យក្រុមគ្រួសារយកទៅធ្វើបុណ្យ។ ចំណែករថយន្ត និងម៉ូតូ សមត្ថកិច្ចបានយកមករក្សាទុកនៅប៉ុស្តិបឹងល្វា ស្រុកសន្ទុក ដើម្បីចាត់វិធានការតាមច្បាប់នៅពេលក្រោយ៕
