ភ្នំពេញៈ បុរសជនជាតិចិនម្នាក់ បានបោកក្បាលស្លាប់ ជាមួយឆ្កែរបស់គាត់ ខណៈកំពុងជិះម៉ូតូ Scoopy ដឹកឆ្កែ ចេញពីតាខ្មៅទៅសង្កាត់កំបូល ដើម្បីធ្វើការ តែជាអកុសលមកដល់ពាក់កណ្តាលផ្លូវ ត្រូវនារី២នាក់ ជិះម៉ូតូ Zoomer-X ឌុបគ្នា វ៉ាជែងរថយន្តក្នុងល្បឿនលឿន ក៏ជ្រុលទៅបុកពេញទំហឹងដួលទាំងសងខាង ចំណែកនារីទាំង២នាក់នោះ ក៏រងរបួសធ្ងន់ដែរ ត្រូវបានរថយន្តគិលានសង្គ្រោះគ្លីនិកឯកជន ដឹកយកទៅសង្គ្រោះភ្លាមៗ បង្កការភ្ញាក់ផ្អើលឡើងទាំងព្រលឹម។
គ្រោះថ្នាក់ចរាចរណ៍ដ៏រន្ធត់នេះ បានកើតមានឡើងនៅវេលាម៉ោង៥ទៀបភ្លឺឈានចូលថ្ងៃទី២៧ ខែវិច្ឆិកា ឆ្នាំ២០១៨នេះ នៅតាមបណ្តោយផ្លូវ៣៧១ ម្ដុំស្ថានីយបូមទឹកស្អុយបឹងទំពុន ជិតក្លឹបឌីក្លូ ឌឹ មីង ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
បុរសរងគ្រោះ (ស្លាប់) ឈ្មោះ ឆា អ៊ីហួយ អាយុ៥១ឆ្នាំ ជនជាតិចិន(ម៉ាឡេ) ធ្វើការរោងចក្រនៅសង្កាត់កំបូល ខណ្ឌពោធិ៍សែនជ័យ ស្នាក់នៅជាមួយប្រពន្ធជនជាតិខ្មែរ នៅភូមិក្រពើហា សង្កាត់ព្រែកឫស្សី ក្រុងតាខ្មៅ ជិះម៉ូតូមួយគ្រឿងម៉ាក Scoopy ពណ៌ឈាមជ្រូក ពាក់ស្លាកលេខភ្នំពេញ 1CG-3912 ខ្ទេចមួយកំណាត់មុខ នឹងសត្វឆ្កែមួយក្បាលក៏ស្លាប់ទៅតាមម្ចាស់ដែរ ចំណែកម៉ូតូមួយគ្រឿងទៀត ម៉ាក Zoomer-X ពណ៌ក្រហមលាយស ពាក់ស្លាកលេខភ្នំពេញ 1HD-2430 បើកបរដោយនារីរូបស្រស់ស្អាត២នាក់ (មិនស្គាល់អត្តសញ្ញាណ) រងរបួសធ្ងន់ ត្រូវបានបញ្ជូនទៅសង្គ្រោះ នៅមន្ទីរពេទ្យភ្លាមៗ ចំណែកម៉ូតូខូចខាតមួយកំណាត់មុខដូចគ្នា។
សាក្សីដែលឃើញហេតុការណ៍ផ្ទាល់បានរៀបរាប់ប្រាប់ភ្នាក់ងារ ខេមប៉ុស្តិ៍ថា មុនពេលកើតហេតុ គេឃើញបុរសជនជាតិចិនរងគ្រោះខាងលើ ជិះម៉ូតូតាមបណ្ដោយផ្លូវ៣៧១ ក្នុងទិសដៅពីកើតទៅលិច ក្នុងល្បឿនធម្មតា ដោយមានដឹកឆ្កែ១ក្បាលនៅលើម៉ូតូផងដែរ លុះដល់ចំណុចកើតហេតុ ស្រាប់តែមាននារីរូបស្រស់២នាក់ ជិះមួយគ្រឿង ធ្វើដំណើរទិសដៅពីលិចទៅកើត ក្នុងល្បឿនលឿន បានវ៉ាជែងរថយន្តមួយគ្រឿងទៀត(មិនចាំម៉ាក) ក៏ជ្រុលទៅបុកម៉ូតូជនរងគ្រោះពេញទំហឹងតែម្ដង ខ្ទាតចេញពីគ្នាជាង៤០ម៉ែត្រ បណ្ដាលឲ្យដួលទាំងសងខាង ដោយបុរសបរទេសខាងលើ បានបោកក្បាលនឹងថ្នល់ស្លាប់ភ្លាមៗ ខណៈឆ្កែនៅលើម៉ូតូនោះ ក៏ខ្ទាតមកកណ្ដាលផ្លូវងាប់ជាមួយម្ចាស់ផងដែរ ចំណែកឯនារីរូបស្រស់ទាំង២នាក់នោះ បានរងរបួសធ្ងន់ នៅហ្នឹងកន្លែងកើតហេតុដែរ ទើបបង្កការភ្ញាក់ផ្អើលដល់បងប្អូនប្រជាពលរដ្ឋនិងអ្នកដំណើរ រួចរាយការណ៍ប្រាប់អោយសមត្ថកិច្ចមូលដ្ឋានចុះមកកន្លែងកើតហេតុ និងហៅរថយន្តសង្គ្រោះបន្ទាន់មកដឹកជនរងគ្រោះយកទៅមន្ទីរពេទ្យផងដែរ។
ក្រោយកើតហេតុ សពត្រូវបានកម្លាំងសមត្ថកិច្ចធ្វើកំណត់ហេតុប្រគល់ទៅអោយសាច់ញាតិដឹកយកទៅតម្កល់នៅផ្ទះក្រុងតាខ្មៅ ដើម្បីរង់ចាំទាក់ទងទៅខាងសាច់ញាតិសពនៅប្រទេសម៉ាឡេស៊ីថា ត្រូវចាត់ចែងធ្វើបុណ្យសពបែបណាទៀត។ ចំណែកម៉ូតូទាំង២គ្រឿង ត្រូវបានកម្លាំងសមត្ថកិច្ចជំនាញចរាចរណ៍ ចុះមកធ្វើការវាស់វែង នឹងយកទៅរក្សាទុកបណ្តោះអាសន្ន នៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រង់ចាំដោះស្រាយគ្នាពេលក្រោយ៕