ភ្នំពេញៈ យ៉ាងហោចណាស់មានមនុស្សប្រុសស្រី៤នាក់ បានរងរបួសធ្ងន់ស្រាល ក្រោយពីមានរថយន្ត Morning មួយគ្រឿង បើកបរដោយប្រុសស្រី២នាក់ប្ដីប្រពន្ធ ក្នុងល្បឿនលឿន ហើយជ្រុលចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តក្រឡាប់៤ត្រឡប់ផ្ងាជើងទ្រមេឃ ប្រពន្ធរបួសធ្ងន់បែកមុខបែកមាត់ និងក្បាល រីឯប្ដីបែកក្បាល និងខ្ទាតរបាំងថ្មទៅកណ្ដាលផ្លូវម្ខាងទៀត បន្តិចក្រោយមកស្រាប់តែតែមានបុរស២នាក់ទៀត ជិះម៉ូតូយ៉ាងលឿនទៅបុកបន្ថែម បណ្ដាលឲ្យរងរបួសធ្ងន់សន្លប់ស្ដូក។
គ្រោះថ្នាក់ដ៏រន្ធត់នេះ បានកើតឡើងកាលពីវេលាម៉ោង២និង២០នាទីរំលងអធ្រាត្រឈានចូលថ្ងៃទី៣០ ខែវិច្ឆិកា ឆ្នាំ២០១៨ នៅត្រង់ចំណុចនៅមុខក្រសួងវប្បធម៌ និងវិចិត្រសិល្បៈក្បែរអគ្គស្នងការនគរបាលជាតិ ស្ថិតនៅលើកំណាត់ផ្លូវព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
អ្នកឃើញហេតុការណ៍បានរៀបរាប់ប្រាប់ឲ្យភ្នាក់ងារខេមប៉ុស្តិ៍ថា មុនពេលកើតហេតុ គេឃើញរថយន្តបង្កម៉ាក Morning ពណ៌ក្រហម ពាក់ស្លាកលេខ ភ្នំពេញ 2AP-0292 បើកបរដោយបុរសនារីរូបស្រស់២នាក់ប្ដីប្រពន្ធ ធ្វើដំណើរចុះពីលើស្ពានអាកាសក្បាលថ្នល់ ទិសដៅពីត្បូងទៅជើង ក្នុងល្បឿនយ៉ាងលឿន លុះមកជិតដល់កន្លែងកើតហេតុ ស្រាប់តែវ៉ាក់អឺម៉ូតូមួយគ្រឿង ក៏ជ្រុលចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តក្រឡាប់៤ត្រឡប់ ក្រឡាប់ផ្ងាជើងទ្រមេឃ ខូចខាតខ្ទេចស្ទើរទាំងស្រុង ហើយបុរសនារី២នាក់ប្ដីប្រពន្ធ រងរបួសធ្ងន់ និងធ្វើឲ្យរបាំងថ្មបាក់អស់២កង់ខ្ទាតទៅកណ្ដាលផ្លូវម្ខាងទៀត មួយសន្ទុះក្រោយមកមានបុរស២នាក់ទៀត ជិះម៉ូតូមួយគ្រឿងម៉ាក Honda Dream ពណ៌ខ្មៅ ពាក់ស្លាកលេខភ្នំពេញ 1BH-2286 ឌុបគ្នា ក្នុងល្បឿនយ៉ាងលឿន ពីជើងទៅត្បូង ក៏ទៅជ្រុលបុករបាំងថ្ម ដែលខ្ទាតមកកណ្ដាលផ្លូវនោះបន្ថែមទៀត បណ្ដាលឲ្យបុរស២នាក់នោះ របួសធ្ងន់ម្នាក់សន្លប់ស្ដូកស្ដឹង និងម្នាក់ទៀតបែកក្បាលហូរឈាម។
ក្រោយកើតហេតុបុរសនារីទាំង២នាក់ប្ដីប្រពន្ធ បានឡើងរថយន្តគិលាសង្គ្រោះគ្លីនិកឯកជន រស្មីទៅមន្ទីរពេទ្យជាមួយគ្នា ចំណែកឯបុរសទាំង២នាក់ ដែលរបួសធ្ងន់ដែរនោះ ត្រូវបានរថយន្តគិលានសង្គ្រោះគ្លីនិកឯកជន មហានគរ មកដឹកយកទៅសង្គ្រោះផងដែរ។
ចំណែករថយន្ត និងម៉ូតូរងគ្រោះ ត្រូវបានសមត្ថកិច្ចជំនាញចរាចរណ៍ចុះទៅធ្វើការវាស់វែងយកទៅរក្សាទុក នៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីរង់ចាំធ្វើការដោះស្រាយលើការខូចខាតទ្រព្យសម្បត្តិរដ្ឋតាមផ្លូវច្បាប់៕
