ភ្នំពេញៈ គ្រោះថ្នាក់ចរាចរណ៍មួយបានកើតឡើងរវាងរ៉ឺម៉កកង់បី ជាមួយនឹងម៉ូតូមួយគ្រឿង បណ្តាលឲ្យមានមនុស្សរងរបួសធ្ងន់ កាលពីវេលាម៉ោង៥៖៣០នាទីព្រឹក ថ្ងៃទី១១ ខែវិច្ឆិកា ឆ្នាំ២០១៨នេះ នៅត្រង់ចំណុចផ្លូវសហព័ន្ធរុស្ស៊ី កែងនឹងផ្លូវ R6 (ម្ដុំសួនច្បារក្ដាន់២) ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
សាក្សីឃើញហេតុការណ៍ផ្ទាល់ ប្រាប់ភ្នាក់ងារខេមប៉ុស្តិ៍ថា នៅមុនពេលកើតហេតុ គេឃើញរ៉ឺម៉កកង់បីមួយគ្រឿង បានធ្វើដំណើរតាមបណ្ដោយផ្លូវ R6 ទិសដៅពីជើងមកត្បូង។ លុះមកដល់ចំណុចកើតហេតុ ស្រាប់តែមានម៉ូតូមួយគ្រឿងទៀតម៉ាក Scoopy ពណ៌ស ពាក់ស្លាកលេខ ភ្នំពេញ 1FW-0463 ជិះឌុបគ្នាពីរនាក់ ក្នុងល្បឿនយ៉ាងលឿន បានបត់ទៅបុកពីក្រោយរ៉ឺម៉កកង់បីពេញទំហឹងតែម្តង បណ្តាលឲ្យអ្នកបើកបរម៉ូតូរងរបួសធ្ងន់។ ភ្លាមនោះ ដោយម្ចាស់រ៉ឺម៉កឃើញសភាពមិនស្រួល បានរត់គេចបាត់ស្រមោល។ រីឯអ្នករួមដំណើរជាមួយនឹងម៉ូតូ ឃើញសភាពបុរសម្នាក់ ដែលរងរបួសធ្ងន់នោះ ដេកស្ដូកស្ដឹងស្មានតែស្លាប់ ក៏បានដាក់មេប្រូចបាត់ពីកន្លែងកើតហេតុដែរទៅ បន្សល់ទុកតែជនរងគ្រោះរងរបួសបាក់ជើងនៅកន្លែងកើតហេតុប៉ុណ្ណោះ។ បន្តិចក្រោយមក សមត្ថកិច្ចបានចុះមកដល់កន្លែងកើតហេតុ បានទាក់ទងទៅកាន់រថយន្តសង្គ្រោះទាន់អាចយកជនរងគ្រោះទៅកាន់មន្ទីរពេទ្យ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចធ្វើការទាក់ទងទៅកាន់សមត្ថកិច្ចជំនាញផ្នែកចរាចរណ៍ក្រុង ចុះមកធ្វើការវាស់វែង និងស្ទូចយករថយន្តទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយពេលក្រោយទៀត៕