មណ្ឌលគិរីៈ ស្នងការរងនគរបាលខេត្តមណ្ឌលគិរី លោក ម៉ី អាន បានឲ្យសារព័ត៌មានដឹងថា សមត្ថកិច្ចឆ្មក់ ចាប់រថយន្តដឹកឈើខុសច្បាប់មួយគ្រឿង កាលពីល្ងាច ថ្ងៃទី២៨ ខែវិច្ឆិកា ឆ្នាំ២០១៨ នៅត្រង់ចំណុចផ្លូវលំ ជិតស្នាក់ការរបៀង ស្ថិតនៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី ។
រថយន្តដែលសមត្ថកិច្ចចាប់ឃាត់នោះ ម៉ាកហ៊ីយ៉ាន់ដាយ (យីឌុប) ពណ៌ត្រេអ៊ី ក្បាល ពណ៌ស ចង្កូតឆ្វេង ពាក់ស្លាកលេខ ស្វាយរៀង 3A-7788 ក្នុងរថយន្តមានផ្ទុកឈើមូល ប្រភេទលេខ១ (សុក្រំ) ចំនួន ៣៧កំណាត់ ក្នុងនោះរួមមាន៖ ឈើកាប់ថ្មីៗ ចំនួន ២៣កំណាត់ និងឈើចាស់មានចំនួន ១៤កំណាត់ ។
ក្នុងការចាប់រថយន្តដឹកឈើខាងលើនេះ មិនត្រូវបានសមត្ថកិច្ចបញ្ជាក់ពីការចាប់តៃកុង និងជនជាមេខ្លោងកាប់ឈើនោះទេ ។
ប៉ុន្តែប្រជាពលរដ្ឋរស់នៅស្រុកកោះញែក បានឲ្យដឹងថា រថយន្តដឹកឈើល្មើសច្បាប់ ដែលសមត្ថកិច្ចចាប់បាន គឺមានម្ចាស់ឈ្មោះ ផាន់ ណា ត្រូវជាប្អូនប្រុសលោក ឧកញ៉ា វី ដា ។
លោក ផាន់ ណា ភ្នាក់ងារសារព័ត៌មាន មិនអាចទំនាក់ទំនងដើម្បីស្នើការឆ្លើយបំភ្លឺ ករណីដឹកឈើល្មើសច្បាប់ខាងលើបានទេតាមទូរស័ព្ទ នៅរសៀលថ្ងៃទី២៩ ខែវិច្ឆិកា ឆ្នាំ២០១៨ ។
លោកស្នងការរងនគរបាលខេត្តមណ្ឌលគិរី បានឲ្យដឹងថា បច្ចុប្បន្នវត្ថុតាង ត្រូវបាននាំយកទៅរក្សាទុក នៅស្នាក់ការបរិស្ថានច្រករបៀង របស់ដែនជម្រកសត្វព្រៃភ្នំព្រេច ដើម្បីចាត់ការតាមនីតិវិធី ៕
