កំពង់ធំៈ រថយន្តហាយឡែនឌ័រមួយគ្រឿង ដឹកឈើប្រណីត ប្រភេទធ្នង់ពេញព្រៀប ត្រូវបានកម្លាំងបរិស្ថាន សហការជាមួយកម្លាំងពាក់ព័ន្ធ ស្ទាក់ចាប់បាននៅយប់ថ្ងៃទី១ ខែវិច្ចិកា ឆ្នាំ២០១៨ ត្រង់ចំណុចស្រុកសណ្តាន់ ខេត្តកំពង់ធំ។
ប្រតិបត្តិការខាងលើនេះ ក្រោមការសម្របសម្រួល និងបញ្ជាពីលោក អ៊ិត សុធា ព្រះរាជអាជ្ញា អមសាលាដំបូងខេត្តកំពង់ធំ គឺកម្លាំងបរិស្ថាន សហការជាមួយបញ្ជាការផ្នែកសឹករងស្រុកសណ្តាន់ និងកម្លាំងប៉ូលិស នៃអធិដ្ឋាននគរបាលស្រុកសណ្តាន់ ដោយបង្រ្កាបបាន រថយន្តហាយឡែនឌ័រ មួយគ្រឿង ពាក់ស្លាកលេខ ខេមរភូមិន្ទ ដឹកឈើធ្នង់ពេញព្រៀប។
តាមមន្រ្តីបរិស្ថាន បានឲ្យដឹងថា រថយន្តផ្ទុកឈើខាងលើនេះ ជាមុខសញ្ញាចាស់ដែលដឹកឈើយ៉ាងសកម្ម ឆ្លងកាត់មុខទីស្នាក់រដ្ឋបាលព្រៃឈើស្រុសណ្តាន់ ខេត្តកំពង់ធំរៀងរាល់ថ្ងៃ។
បច្ចុប្បន្នរថយន្ត និងឈើ ត្រូវបានអូសមករក្សាទុកនៅស្នាក់ការបរិស្ថានសណ្ដាន់ រីឯអ្នកបើកបររថយន្ត ត្រូវបានសមត្ថកិច្ចយកសួរនាំ៕