ភ្នំពេញៈ យុវជន៦នាក់ ជិះម៉ូតូកង់បីឡាំប៉ាតា(ឥណ្ឌា) ចូលខារ៉ាអូខេ ខ្វះលុយឲ្យគេ បែរជាចោទប្រកាន់ថា ម្ហូបថ្លៃពេក នាំគ្នាឈ្លោះប្រកែកជាមួយម្ចាស់ហាង ផ្អើលអស់សមត្ថកិច្ច និងអ្នកសារព័ត៌មាន កាលវេលម៉ោង១២៖៣០នាទីរំលងអធ្រាត្រ ឈានចូលថ្ងៃទី២ ខែវិច្ឆិកា ឆ្នាំ២០១៨ នៅតាមបណ្ដោយផ្លូវ២០០៤(ហៅផ្លូវម៉ៃដា) ដែលមានយីហោ “ញ៉ូវ ស្កាយ” ស្ថិតនៅភូមិត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីយុវជនទាំង៦នាក់ មិនបញ្ជាក់ឈ្មោះនោះទេ បាននិយាយថា នៅមុនពេលកើតហេតុ ពួកគាត់បាននាំគ្នាមកផឹកស៊ី នៅផ្លូវ២០០៤ ហើយបុគ្គលិកហាងខាងលើ បានមកស្ទាក់ផ្លូវគាត់ ប្រាប់តម្លៃស្រាក្នុងមួយកេះតម្លៃ៣៥ដុល្លារ Freeម្ហូប៤មុខទៀត ព្រមទាំងFreeស្រីស្អាត អង្គុយកំដរមួយម្នាក់ទៀតផង។ បន្ទាប់មកពួកគាត់មើលទៅក្នុងតម្លៃសមល្មម ក៏បាននាំគ្នាចូល ខណៈដែលពួកគាត់ផឹកអស់ចំនួនមួយកេះហើយ ក៏បានឲ្យគេគិតលុយអស់ចំនួន៨០ដុល្លារ។ ពេលនោះពួកគាត់ឆ្ងល់អស់ថ្លៃម្ល៉េះ និយាយគ្នា៣៥ដុល្លារ តែដល់យកវិកយបក្រមក ស្រាប់តែឃើញអស់ចំនួន៨០ដុល្លារ ហើយគ្មានលុយឲ្យក៏ឈ្លោះជាមួយម្ចាស់ហាងតែម្តង។
តាមសម្តីពីម្ចាស់ហាងខាងលើ បាននិយាយប្រាប់ថា តម្លៃស្រាមួយឈត់ និងម្ហូបFree៤ចាន តម្លៃ៣៥ដុល្លារ និងហៅថែមចំនួន៥ចានទៀត ឡើងដល់ចំនួន៨០ដុល្លារ ម្ដេចថាគិតលុយលើស។ ហើយយុវជនម្នាក់ ក្នុងចំណោម៦នាក់នោះ បាននិយាយថា មុខម្ហូបទាំង៥មុខខាងលើ ពួកគាត់មិនបានហូបឡើយ គឺខាងស្រីៗជានាក់ហូបទេ ម្តេចក៏គិតដែរ។ ចំណែក ម្ចាស់ហាងបាននិយាយប្រាប់ថា ស្រីៗហូបព្រោះនាងថា ពួកបងៗជាអ្នកឲ្យហូប។
ក្រោយពេលកើតហេតុ ទើបប្តឹងដល់នគរបាលប៉ុស្តិ៍ មកសម្របសម្រួលនៅកន្លែងកើតហេតុ ហើយភាគីទាំងសង្ខាងបានបញ្ចប់ក្នុងតម្លៃ២៤ម៉ឺនរៀល៕