ស្ទឹងត្រែងៈ បុរសអ្នកលក់ភេសជ្ជៈអូរអ៊ីឈិក និងទឹកប្រទាល ប្រចាំក្រុងស្ទឹងត្រែងម្នាក់ ត្រូវបានកម្លាំងនគរបាលក្រុងស្ទឹងត្រែង ដឹកនាំដោយលោកវរសេនីយ៍ត្រី ប៉ាង ឡុច អធិការរងទទួលផែនយុត្តិធម៌ ធ្វើការឃាត់ខ្លួន ពាក់ព័ន្ធករណីគំរាមជំរិតទារប្រាក់។
លោកវរសេនីយ៍ត្រី ប៉ាង ឡុច បានឲ្យដឹងថា នៅព្រឹកថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៧ ខែវិច្ឆិកា ឆ្នាំ២០១៨ ដោយបានទទួលពាក្យបណ្តឹងរបស់ម្ចាស់ទីតាំងប្តូរប្រាក់ និងវេរលុយ យីហោ “ហេង ឡាយ” ទីលំនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង និងដោយមានការបញ្ជាផ្ទាល់ពីលោកវរសេនីយ៍ឯក ឈូក កុម៉ល់ អធិការនគរបាលក្រុងស្ទឹងត្រែង លោកបានដឹកកម្លាំងជំនាញចុះទៅឃាត់ខ្លួនជនសង្ស័យឈ្មោះ ម៉ៅ ឌីណា ភេទប្រុស អាយុ២១ឆ្នាំ អ្នកលក់ភេសជ្ជៈអូរអ៊ីឈិក និងទឹកប្រទាល ប្រចាំក្រុងស្ទឹងត្រែង មានទីលំនៅភូមិស្រែក្រសាំង ស្រុកសៀមបូក ខេត្តស្ទឹងត្រែង។
លោកវរសេនីយ៍ត្រី ប៉ាង ឡុច បានបន្តទៀតថា ជនសង្ស័យរូបនេះ បានប្រើប្រាស់បណ្តាញសង្គម Facebook page (ម៉ៅ ឌីណា) ដោយនិយាយបំភ្លើសការពិត និងគំរាមទារប្រាក់ពីទីតាំងប្តូរប្រាក់ ហេង ឡាយចំនួន១០០០$ ជាថ្នូរ ការមិនឲ្យបង្ហោះរូបភាពបន្ត។
បើយោងតាមហ្វេសប៊ុនឈ្មោះ ម៉ៅ ឌីណ បានសរសេររៀបរាប់ថា "លុយរាយខ្មែរទៅទិញកាតទូរស័ព្ទនៅផ្ទះ ហេង ឡាយ គេមិនយកទេ គាត់ថាខ្ជិលរាប់ ចង់សួរថា បងប្អូនជាកូនខ្មែរអ្នកខេត្តស្ទឹងត្រែងយើងយល់យ៉ាងណា? មានលុយទៅទិញគេហើយ គេថាខ្ជិលរាប់"៕