ភ្នំពេញៈ ក្រុមចោរបានចូលលួចទូរដែកមួយ ដែលដាក់សុទ្ធតែរបស់មានតម្លៃ ក្នុងផ្ទះអ្នកជំនួញ ក្នុងបុរីចំការមន បើគិតជាទឹកប្រាក់ជាង៣០ម៉ឺនដុល្លារ កាលពីព្រឹកថ្ងៃទី២៤ ខែវិច្ឆិកា ឆ្នាំ២០១៨ នៅក្នុងផ្ទះលេខD២៩ បុរីចំការមន ផ្លូវDបេតុង ក្រុម៦ ភូមិទី១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
មន្ត្រីនគរបាលរាជធានីភ្នំពេញ បានឲ្យដឹងថា ម្ចាស់រងគ្រោះឈ្មោះ LI TAO ភេទប្រុស អាយុ៤១ឆ្នាំ ជនជាតិចិន សញ្ជាតិខ្មែរ មុខរបរអ្នកជំនួញ ស្នាក់នៅផ្ទះកើតហេតុខាងលើ។
សម្ភារៈបាត់បង់រួមមាន៖ ចិញ្ចៀនលោហធាតុពណ៌ស មួយវង់ តម្លៃប្រហែល១៥០០០ដុល្លារ, កងដៃលោហធាតុពណ៌ស ដាំត្បូងពេជ្រ តម្លៃ ១០០០០ម៉ឺនដុល្លារ, ក្រវិលដាំត្បូងពេជ្រ១គូរ តម្លៃប្រហែល៣ម៉ឺនដុល្លារ, ចិញ្ចៀន និងខ្សែកលោហធាតុពណ៌សមួយចំនួនទៀត តម្លៃប្រហែល១០០០០ម៉ឺនដុល្លារ, បណ្ណបញ្ញើប្រាក់ធនាគារប្រៃណីយ៍១សន្លឹក, លុយចំនួន៣ម៉ឺនដុល្លារ, កាក់មាសប្រាក់ ប្រហែល៥០កាក់ តម្លៃ៣ម៉ឺនដុល្លារជាង, កាបូបស្ពាយម៉ាកLV ពណ៌ខ្មៅ មួយតម្លៃ២០០០ដុល្លារ, ប្លង់ផ្ទះលេខC៦ ០២, និងវិមានកូលាប១, ប្លង់ដីនៅសង្កាត់ភ្នំពេញថ្មី១សន្លឹក, ប្លង់ផ្ទះលេខ៩២៣-SA(C២)នៅសង្កាត់ អូរឡាំពិច, ប្លង់ខុនដូររីវើវ៉ាកោះពេជ្រ១, ពាក្យស្នើរកាន់កាប់ដីធ្លីនៅខេត្តសៀមរាម១សន្លឹក, នាឡិការដៃ ចំនួន៤គ្រឿង សរុបតម្លៃ១៦ម៉ឺនដុល្លារ, ចិញ្ចៀនពេជ្រ ១គ្រាប់ តម្លៃ៤ម៉ឺនដុល្លារ។ សម្ភារៈដកហូតស្លាកស្នាមក្រយ៉ៅម្រាមដៃ១កន្លែង។
ប្រភពពីឈ្មោះ ដា ធារី ភេទស្រី អាយុ៣០ឆ្នាំ មុខរបរអ្នកបម្រើ ទីលំនៅផ្ទះលេខ៩២៤ ផ្លូវលំ ភូមិតារាបដូនស ឃុំគគី ស្រុកកៀនស្វាយ ខេត្តកណ្តាល ស្នាក់នៅផ្ទះកើតហេតុខាងលើ បានឲ្យដឹងថា នៅថ្ងៃទី២១ ខែវិច្ឆិកា ឆ្នាំ២០១៨ វេលាម៉ោង៧និង២០នាទី ម្ចាស់ផ្ទះនិងក្រុមគ្រួសារបានចេញទៅដើរលេងបាត់ ចំណែកនាងខ្ញុំក៏នៅបោសសម្អាតផ្ទះរួចរហូតដល់ម៉ោង១២និង២០នាទី នាងខ្ញុំចាក់សោរទ្វារផ្ទះនឹងទ្វាររបងគ្រាន់តែខ្ទាស់ពុំមានចាក់សោរទេ ចេញទៅផ្ទះរបស់ខ្ញុំនៅកៀនស្វាយ ខេត្តកណ្តាល លុះដល់ថ្ងៃទី២៤ ខែវិច្ឆិកា ឆ្នាំ២០១៨ វេលា៨និង៣០នាទី នាងខ្ញុំក៏ត្រឡប់មកវិញ បើកទ្វាររបងចូល ស្រាប់តែឃើញទ្វារផ្ទះគ្រាន់តែបិទផ្អឹបនិងកូនសោរឡាននិងសោរផ្ទះនៅលើកៅអីខាងក្រៅ នាងខ្ញុំក៏ឡើងទៅលើផ្ទះឃើញទូរដែកក្នុងបន្ទប់ម្ចាស់ផ្ទះបាត់ នាងខ្ញុំក៏ទូរស័ព្ទទៅអ្នកបកប្រែម្ចាស់ផ្ទះឲ្យប្រាប់ទៅម្ចាស់ផ្ទះថាមានចោរចូលលួចទូរដែក។
ប្រភពពីម្ចាស់ផ្ទះបានឲ្យដឹងថា នៅថ្ងៃទី២១ ខែវិច្ឆិកា ឆ្នាំ២០១៨ វេលាម៉ោង០៩និង១០នាទីខ្ញុំនិងប្រពន្ធកូននិងឪពុកម្តាយខ្ញុំបានចេញពីផ្ទះទៅដើរលេងនៅខេត្ត កោះកុង ទុកអោយអ្នកបម្រើឈ្មោះ ដា ធារី នៅមើលផ្ទះលុះដល់ថ្ងៃទី ២២ ខែវិច្ឆិកា ឆ្នាំ២០១៨ ខ្ញុំនិងក្រុមគ្រួសារបានជិះយន្តហោះទៅលេងប្រទេសថៃរហូតដល់ថ្ងៃទី២៤ ខែវិច្ឆិកា ឆ្នាំ២០១៨ វេលា១០និង៣០នាទី ឈ្មោះយ៉ាំង ឡឺ ភេទប្រុសជាអ្នកបកប្រែឲ្យខ្ញុំបានទូរស័ព្ទមកប្រាប់ខ្ញុំថា មានចោរលួចទូរដែកក្នុងផ្ទះ។
បច្ចុប្បន្ន កម្លាំងសមត្ថកិច្ចជំនាញកំពុងធ្វើការស្រាវជ្រាវស្វែងរកចាប់ខ្លួនជនសង្ស័យ ដើម្បីយកមកផ្តន្ទាទោសតាមផ្លូវច្បាប់៕