ភ្នំពេញៈ បុរសជាសន្តិសុខម្នាក់ ដេកលក់មួយភាំង មិនដឹងថា ចោរលួចចូលធ្វើសកម្មភាព កាច់ក យកម៉ូតូ Nex មួយគ្រឿង បានសម្រេចរួចអូសចេញទៅក្រៅតាំងពីពេលណា ទាល់តែលឺសំឡេងបញ្ឆេះម៉ូតូ ទើបភ្ញាក់ ស្ទុះរត់ចេញទៅមើល បានត្រឹមឃើញជនសង្ស័យកំពុងជិះម៉ូតូរបស់ខ្លួន ចេញទៅបាត់ ដោយសុវត្ថិភាព និងមិនរំខានសមត្ថកិច្ចខណ្ឌច្បារអំពៅ ណាជួយអន្តរាគមន៍ទេ ។
ហេតុការណ៍នេះ កើតឡើងនៅវេលាម៉ោង៤ទៀបភ្លឺ ថ្ងៃសៅរ៍ ទី២៤ ខែវិច្ឆិកា ឆ្នាំ២០១៨ នៅចំណុចតូបយាមមុខច្រកចូលបុរី តាង៉ូវ ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
ជនរងគ្រោះម្ចាស់ម៉ូតូ ឈ្មោះ ជា សាមឌី ភេទប្រុស អាយុ៣០ឆ្នាំ មុខរបរសន្តិសុខ យាមបុរី តាង៉ូវ ស្នាក់នៅភូមិតាង៉ូវកណ្ដាល សង្កាត់និរោធ ខណ្ឌច្បារអំពៅ រាជធានីភ្នំពេញ និងមានស្រុកកំណើត នៅភូមិក្រោលគោ ស្រុកស្វាយជ្រុំ ខេត្តស្វាយរៀង ។
ប្រភពព័ត៌មានពីជនរងគ្រោះបានរៀបរាប់ប្រាប់ភ្នាក់ងារ Cam Post (ខេមប៉ុស្តិ៍) បានដឹងថា នៅមុនពេលកើតហេតុ ម៉ោងជាង៣ទៀបភ្លឺ ថ្ងៃកើតហេតុខាងលើ ជនរងគ្រោះបានជិះម៉ូតូមួយគ្រឿង ជារបស់ប្អូន ម៉ាក Suzuki Nex ពណ៌ស ស្លាកលេខ ស្វាយរៀង 1K-8392 មកទុកនៅចំណុចជិតតូបសន្តិសុខយាម មុខច្រកចូលបុរី តាង៉ូវ រួចក៏បានចូលទៅសម្រាក ក្នុងតូបយាមនោះ បានមួយភាំង ដោយមិនដឹងថា ចោរលួចចូលធ្វើសកម្មភាព កាច់ក យកម៉ូតូខាងលើ រួចអូសចេញទៅក្រៅសោះឡើយ ទាល់តែឮសំឡេង បញ្ឆេះម៉ូតូ ទើបភ្ញាក់ដឹងខ្លួន ហើយក៏ស្ទុះរត់ចេញទៅមើល បានត្រឹមតែឃើញជនសង្ស័យកំពុងជិះម៉ូតូរបស់ខ្លួន ចេញទៅបាត់ដោយសុវត្ថិភាព និងមិនរំខានសមត្ថកិច្ចប៉ុស្តិ៍រដ្ឋបាលនិរោធ នៃអធិការដ្ឋានខណ្ឌច្បារអំពៅ ចេញជួយអន្តរាគមន៍នោះទេ ទើបបុរសរងគ្រោះ បានហៅកង់បី PassApp ដឹកទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលនិរោធ នៃអធិការដ្ឋានខណ្ឌច្បារអំពៅ ដើម្បីឲ្យសមត្ថកិច្ចជួយស្រាវជ្រាវតាមរកជនសង្ស័យ ។
និងករណីទី២ វាយប្លន់យកម៉ូតូបានសម្រេច បានកើតឡើងនៅវេលាម៉ោង០៥:០៥នាទី ទៀបភ្លឺ ថ្ងៃដដែល នៅត្រង់ចំណុចមុខសាលាចិន ហួរ ម៉េង លើកំណាត់ផ្លូវ៣៦៩ ស្ថិតក្នុងសង្កាត់ព្រែកប្រា ខណ្ឌច្បារអំពៅ ខណៈដែលយុវជន ប្រុស ស្រីមួយក្រុម បានជិះម៉ូតូត្រឡប់មកពីដើរលេង បុណ្យអុំទូកវិញ ត្រូវបានជនសង្ស័យមួយក្រុម បានធ្វើសកម្មភាពវាយប្លន់យកម៉ូតូ ១គ្រឿង បានសម្រេច រួចជិះគេចខ្លួនបាត់ ដោយសុវត្ថិភាព មិនរំខានសមត្ថកិច្ចប៉ុស្តិ៍ព្រែកប្រា ចេញអន្តរាគមន៍ឡើយ ហើយជនរងគ្រោះបាននាំគ្នាមកដាក់ពាក្យបណ្ដឹងនៅប៉ុស្តិ៍នគរបាលនិរោធ តែសមត្ថកិច្ចប៉ុស្តិ៍និរោធបានប្រាប់ឲ្យជនរងគ្រោះទាំងនោះ ទៅដាក់ពាក្យបណ្ដឹងនៅប៉ុស្តិ៍នគរបាលសង្កាត់ព្រែកប្រាវិញ ទើបជនរងគ្រោះ ក៏បានជិះម៉ូតូចេញទៅ ទាំងដែលអ្នកយកព័ត៌មានមិនទាន់បានសួរនាំមូលហេតុ និងភិនភាគច្បាស់លាស់នោះទេ ដោយប្រាប់មកថា ចាំព្រឹកទៅដាក់ពាក្យបណ្ដឹងនៅប៉ុស្តិ៍នគរបាលព្រែកប្រា ហើយក៏នាំគ្នាជិះចេញពីប៉ុស្តិ៍នគរបាលនិរោធបាត់អស់ ៕
